उपत्यका लगायत देशैभर चिसो बढ्यो, जनजीवन प्रभावित
काठमाडौँ,पुस ७
काठमाडौँ उपत्यकासहित देशभर ह्वात्तै चिसो बढेको छ । चिसोले दिनप्रतिदिन जनजीवन प्रभावित बन्दै गएको छ । सोमबार बिहान काठमाण्डौ उपत्यकाको न्यूनतम तापक्रम ३।३ डिग्री सेल्सियस मापन गरिएको जल तथा मौसम पूर्वानुमान महाशाखाले जनाएको छ ।
अझै केही दिन तापक्रम यस्तै रहने र तत्कालै पानी पर्ने सम्भावना नरहेको महाशाखाले जनाएको छ । सोमबार पनि तराईमा बाक्लो कुहिरो लागेको छ । दिउँसो केहीबेर कुहिरो हटे पनि केही दिनदेखि बिहान र बेलुका बाक्लो कुहिरो लाग्दा घरबाहिर निस्कनसमेत समस्या भएको स्थानीय बासिन्दाले बताएका छन् ।
केही दिनयता तराईका क्षेत्रमा लगातार जस्तै कुहिरो लाग्दा जनजीवन प्रभावित भएको हो । सोमबार पनि तराईमा दिउँसो १ बजेसम्म कुहिरो लाग्ने र त्यसपछि हट्ने सम्भावना रहेको मौसमविद् मिनकुमार अर्यालले बताउनुभयो । मंगलबारबाट भने कुहिरो लाग्ने क्रम बिस्तारै कम हुँदै जाने र अन्य स्थानको मौसम भने आज सफा रहने उहाँले बताउनुभयो।
प्रकाशित मिति: ७ पुस २०७६, सोमबार
