मुख्यमन्त्री राईद्धारा छठ पर्वको शुभकामना व्यक्त

विराटनगर, कात्तिक १६
प्रदेश नं १ का मुख्यमन्त्री शेरधन राईले छठ पर्व २०७६ को अवसरमा शुभकामना व्यक्त गर्नुभएको छ । छठ पर्वको अवसरमा एक शुभकामना सन्देश जारी गर्दै स्वदेश तथा विदेशमा रहेका सबै नेपाली दाजुभाई तथा दिदिबहीनीहरुमा सुख, शान्ति, समृद्धि एवं उत्तरोत्तर प्रगतिको लागि शुभकामना व्यक्त गर्नुभएको हो ।

सूर्य देवता र छठी माताको पूजा आराधना गरी मनाइने छठ पर्वले सबै नेपालीमा राष्ट्रिय एकता, अखण्डता, मेलमिलाप र आपसी सद्भाव कायम गर्न मद्धत पुग्ने मैले विश्वास लिएको छु, जारी शुभकामना सन्देशमा भनिएको छ ।

हाम्रो समाजमा मनाउने गरिएका विभिन्न चाडपर्वहरुले भौगोलिक, सांस्कृतिक र भाषिक विविधताबीच रहेको सांस्कृतिक एकता र पहिचानलाई अक्षुण्ण राख्न महत्वपूर्ण योगदान गरिरहेका छन् । हाम्रो धरोहरका रुपमा रहेका चाडपर्वहरु बहुमूल्य सांस्कृतिक सम्पदा समेत हुन्, मुख्यमन्त्री राईद्धारा जारी सन्देशमा भनिएको छ ।

यो पर्वले नेपालका सबै जातजाति एकताबद्ध भई आपसी सद्भाव तथा भातृत्व अभिवृद्धि गरी विकास र समृद्धि पथमा संलग्न हुने प्रेरणा मिल्ने अपेक्षा समेत मुख्यमन्त्री राईले गर्नुभएको छ ।