सबैलाई आश्चर्यमा पार्दै पारस खड्काले छाडे राष्ट्रिय टोलीको कप्तानी

काठमाडौं, असोज २८

नेपाली राष्ट्रिय क्रिकेट टिमका कप्तान पारस खड्काले पदबाट राजीनामा दिएका छन् । खड्काले फेसबुकमार्फत कप्तानको जिम्मेवारीबाट अलग हुने घोषणा गरेका हुन् । कप्तानबाट अलग भए पनि राष्ट्रिय टिममा रहेर पारसले अझै केही समय खेल्नेछन् । पारसको निर्णयले खेल पदाधिकारी, खेलाडी र फ्यानहरु आश्चर्यमा परेका छन् ।

अन्तर्राष्ट्रिय क्रिकेट काउन्सिल (आईसीसी)ले नेपालको निलम्बन ससर्त फुकुवा गरेको भोलिपल्टै खड्काले राजीनामाको घोषणा गरेका हुन् । साथै उनले निलम्बन फुकुवाको स्वागत समेत गरेका छन् ।

नयाँ सुरुवातका लागि आफूले कप्तान पद छाड्ने निर्णय लिएको उनले उल्लेख गरेका छन् ।

२००४ मा सिनियर टिमबाट डेब्यू गरेका उनले २००९ मा राष्ट्रिय टिमको कप्तानी सम्हालेका थिए । उनको कप्तानीमा नेपालले २०१३ मा टी ट्वान्टी विश्वकप २०१४ मा खेल्यो भने २०१८ मा एकदिवसीय मान्यता पाएको थियो ।