सुत्केरी व्यथा लाग्दै गर्दा भोट दिन पुगिन् महिला, ८० वर्षे वृद्धाले स्लाइनसहित मतदान गरिन्

भारतमा लोकसभा चुनावको दोस्रो चरणको मतदान बिहिबार भयो । यतिबेला मानिसहरुबीच भोट हाल्ने क्रेज देखियो । कर्नाटकको पांडवपुरामा मंगला नामकी एक महिला सुत्केरी व्यथाले च्यापिरहेका बेला नै साढे सात बजे भोट दिन पुगिन् । त्यसपछि उनलाई तुरुन्त अस्पताल पुर्याइयो । उनले साढे ९ बजे छोरीलाई जन्म दिइन् । डाक्टरले अलि बेर भएको भने जोखिम पनि हुनसक्ने बताए ।

यसैगरी विहारको कटिहारको हसनगंजमा ८० वर्षीया वृद्धा दुलारी देवीले मतदान गरिन् । उनी निकै बिरामी थिइन् । ग्लुकोजको सलाइन राखिएको थियो । उनले भोट हाल्ने इच्छा व्यक्त गरेपछि परिवारले उनलाई खटियामा राखेर मतदान केन्द्र पुर्याए ।

दोस्रो चरणमा ६७.९४ प्रतिशत भोट भयोः

दोस्रो चरणमा १२ राज्यको ९५ सिटमा ६७.९४ प्रतिशत मतदान खस्यो । दोस्रो चरणमा १६२९ प्रत्यासी मैदानमा थिए । सन् २०१४ मा यी ९५ सिटमा ६५ प्रतिशत मतदान भएको थियो । जबकी सन् २००९ मा ९५ सिटमा ६२.४९ प्रतिशत मतदान भएको थियो । कर्नाटकमा यसपटक ६८.१६ प्रतिशत मतदान भयो ।