टक्सार महोत्सव शुरु (फोटो-फिचर)

भोजपुर, फागुन १
टक्सार स्थापनाको दुई सय बर्ष पुगेको अवसरमा शनिबारबाट पूर्वि पहाडी जिल्ला भोजपुरमा टक्सार महोत्सव शुरु भएको छ । महोत्सवको उप–प्रधान तथा रक्षा मन्त्री भिम रावलले महोत्सव स्मारकमा सजाएर राखिएको सात फिट अग्लो चार सय केजीको करुवाको अनावरण गरेर र सूचना तथा सञ्चार मन्त्री शेरधन राईले डोली पैसाको स्मारकको अनावरण गरेर महोत्सवको उदघाटन गरेका छन् ।

शाहवंशीय राजा गीर्बाणुयुद्ध विक्रम शाहको कार्यकालमा वि.सं १८७२ सालमा टक्सार बजारको स्थापना भएको हो । त्यतिबेला यो ठाउँमा टक्सार खानी अड्डाको स्थापना भएपछि तामाका एक पैसे र दुई पैसे डोली पैसा छापिन थालिएको थियो ।

यो ठाउँमा टक्सार स्थापना भएपछि गाउँकै नाम टक्सार रहन गएको हो । टक्सार बजार स्थापनाको दुई सय बर्ष पुगेपनि बजार र यहाँको कला कौशल लोप हुन थालेपछि द्धिशतबार्षिक टक्सार महोत्सवको आयोजना गरिएको हो ।

बर्तमानको रुग्ण स्थितिमा सुधार ल्याउन, धार्मिक, साँस्कृतिक सम्पदाको संरक्षण गर्न, पर्यटकिय स्थलको विकास, धातु उद्योगको संरक्षण गर्न महोत्सव आयोजना गरिएको द्धिशतबार्षिक टक्सार महोत्सव २०७२ आयोजक समितिका अध्यक्ष गणेश बज्राचार्यले बताए । महोत्सव एक हप्तासम्म सञ्चालन हुँदैछ ।
महोत्सवमा इतिहासविद्हरुको सम्मेलन, संस्कृतिकर्मीहरुको गोष्ठी, साहित्यिक कार्यक्रम, सांगीतिक कार्यक्रम तथा मनोरञ्जनात्मका कार्यक्रम हुँदैछन् । महोत्सवमा करीब ५० लाख खर्च हुने आयोजकको अनुमान छ । कार्यक्रममा विशिष्ट ब्यक्तिहरूकाे समेत उपस्थिति रहेकाे छ । पूर्व मन्त्री हेमराज राइ, शंकर प्रसाद काेइराला, कृपासुर शेर्पा, सांसद जयन्ती राइ लगायतकाे उपस्थिति छ भने उनिहरूले महाेस्तसवमा शुभकामना मन्तव्य समेत राखेका छन् ।

महोत्सवका लागि विभिन्न जिल्लाबाट सर्वसाधारणको बाक्लो भिड लागेको छ । टक्सारमा जन्मिएर अन्यत्र बस्दै आएकाहरु महोत्सवमा आफ्नो जन्म ठाउँमा भेला भएका छन् । दुई सय बर्षअघि प्रधानमन्त्री भिमसेन थापाको पालामा स्थापित टक्सार बजार लोपोन्मुख अबस्थामा पुगेपछि स्थानीयबासी टक्सारको साख जोगाउन लागेका हुन् ।