इँटा प्रहार गरेर ७० वर्षीय वृद्धको हत्या
कपिलवस्तु चैत ६
कपिलवस्तुमा इँटा प्रहार गरेर ७० वर्षीय वृद्धको हत्या भएको छ ।
कपिलवस्तुको शिवराज नगरपालिका ६ पिपरी चोकस्थित गणपति पेट्रोल पम्प अगाडि घरमा सुतिरहेका ७० वर्षीय त्रिवेणी यादवको बुधबार बिहान हत्या भएको हो ।
प्रहरीका अनुसार यादवलाई बुधबार बिहान ३ बजे इँटा प्रहार गरेर हत्या गरिएको हो । बिहान स्थानीय छेदी चौधरीले यादवलाई मृत अवस्थामा देखेपछि प्रहरीलाई जानकारी गराएकी थिइन् । मृतक यादवको टाउको र अनुहारमा चोट लागेको छ ।
जानकारी लगत्तै प्रहरीले टोली घटनास्थलमा अनुसन्धान सुरु गरेको थियो । मृत त्रिवेणीको नजिकै अवधी भाषामा लेखिएको एक पत्रसमेत भेटिएको प्रहरीले जानकारी दिएको छ ।
प्रकाशित मिति: ६ चैत्र २०७५, बुधबार
