बिन लादेनका छोराको टाउको ल्याउनेलाई ११ करोड पुरस्कार

काठमाडौ फागुन १७
अमेरिकाले आतंकवादी संगठन अलकायदाका नेता ओसामा बिन लादेनका छोरा हमजा बिन लादेनको विषयमा सूचना दिनेलाई १० लाख डलर (करिब ११ करोड रुपैयाँ) पुरस्कार दिने घोषणा गरेको छ । अमेरिकी गृह मन्त्रालयले हमजालाई अलकायदाको प्रमुख नेताको रुपमा चित्रण गर्दै उक्त घोषणा गरेको हो ।

पछिल्ला वर्षमा हमजाले थुप्रै भिडियो रिलिज गरेका छन् जसमा उनले आफ्ना पितालाई मार्ने अमेरिका र उसका पश्चिमी सहयोगीहरुसँग बदला लिनका लागि समर्थकहरुलाई एकजुट हुन आह्वान गरेका छन् । अमेरिकी विशेष बलले सन् २०११ मा पाकिस्तानको एबटाबादमा ओसामा बिन लादेनको हत्या गरेको थियो ।

ओसामाका छोरा हमजा ३० वर्षका छन् । अमेरिकाले उनलाई दुई वर्ष अगाडि नै आतंककारी घोषणा गरेको थियो । हमजाले मोहम्मद अताकी छोरीसँग बिहे गरेका छन् । मोहम्मद अता उनै हुन् जसले २००१ को हमलामा चार व्यवसायिक बिमानमध्ये एउटा अपहरण गरेका थिए र त्यसले न्यूयोर्कको वल्र्ड ट्रेड सेन्टरमा आक्रमण गरेका थिए ।

एबटाबादमा बिन लादेनको घरबाट केही चिठी भेटिएका थिए जसबाट खुलेको थियो कि हमजालाई भावि नेताको रुपमा तयार गरिँदै छ । हमजालाई ओसामाले सबैभन्दा बढि माया गर्थे ।

अमेरिकी गृह मन्त्रालयको डिप्लोमेटिक सेक्यूरिटीका असिस्टेन्ट सेक्रेटरी माइकल इवेनअफले भने, ‘सम्भवतः उनी अफगान-पाकिस्तान सीमामा हुन सक्छन् ।’ हमजाले इरानमा आफ्नी आमासँगै धेरै वर्ष बिताएका थिए । त्यही उनको बिहे भएको थियो ।