विदेशी माफियाको डिजाइनमा केसीले अनसनलाई मजाक बनाउनुभयो – अधिकारी

काठमाडौं चिकित्सा शिक्षा विधेयकलाई लिएर डा. गोविन्द केसी यतिबेला १६ औँ अनसन बसेका छन् । यही विषयमा सत्तारुढ दल नेकपा निकट युवासंघ नेपालकी केन्द्रीय सचिव तथा महिला विभाग प्रमुख अञ्जना अधिकारीसंग छोटो कुराकानी

चिकित्सा शिक्षाको सधारका लागि भन्दै १६ औँ अनसन बसिरहनु भएका डा. गोविन्द केसीका बारेमा तपाईं के भन्नुहुन्छ ?

यो एउटा नचाहिदो जिद्दिपना र केटाकेटी पारा हो । डा केसीले अनशनलाई मजाक बनाइरहनु भएको छ । जायज मागहरूलाई सरकारले सम्बोधन गर्दै आउँदा पनि अनावश्यक महत्वकाक्षां राखेर राज्य, सरकार र सदनलाई अटेरी गरी उहाँ आफ्नो बौधिकताको आफै खिल्ली उडाइरहनु भएको छ ।

एउटा सरकारी कर्मचारी भएर पनि सरकारलाई टेर्दिन भन्नुले उहाँ प्राध्यापक डाक्टर भन्दा पनि राजनीतिक दलको एउटा कार्यकर्ता हो कि भन्ने प्रश्न चिन्ह पैदा भएको छ । सरकारको तलब खाएर पटक–पटक सरकार कै विरुद्ध अनशन बस्ने अधिकार उहाँलाई छैन । ओत लागेर बसेको आफ्नै घरलाई तलबाट धमिराले जस्तो घर कमजोर बनाउने अधिकार कसैलाई पनि हुंदैन, चाहे त्यो डा. गोविन्द के.सी. हुन् या अरु कोही । त्यसकारण उहाँको यो अहिलेको अनसन सरासर गलत छ र पुर्वाग्रही छ ।

युवा संघले यसको विषयमा कस्तो योजना बनाएको छ ?

युवा संघ नेपाल “सुखी नेपाली समृद्ध नेपाल” को पक्षमा छ । मुलुकको विकासले तीव्र गति लिनुपर्छ भन्ने धारणा र योजनामा हामी छौँ । जसको निमित्त देशमा रहेका सबै युवाहरू शिक्षित हुनुपर्छ, स्वरोजगार हुनुपर्छ, आफ्नै देशमा रहेर अवसर पाउनु पर्छ, ज्ञान, सीप र प्रविधि हासील गरी मुलुक निर्माणको निमित्त युवाहरूको क्षमता यही देशमा प्रयोगमा आउनुपर्छ भन्ने मान्यता युवा संघको हो । देशको समृद्धि र विकासमा आफ्नो योगदान दिनुपर्ने बेलामा चिकित्सा शिक्षा जस्तो महत्वपूर्ण क्षेत्र, जसबाट प्रशस्त मात्रामा बौद्धिक र राष्ट्रसेवक डाक्टरहरू जमिन्छन् र देशका दुरुदराजमा गएर सेवा दिन्छन् । त्यस्तो क्षेत्रमा अनावश्यक बखेडा खडा गर्नु डा. के.सी.को मुर्खता हो ।

देशको अर्बौँ धनराशी यही शिक्षा हासिल गर्न बाहिरिरहेको छ र संगसंगै विकासका प्रमुख शक्ति युवाहरू पनि यही कारण विदेश पलायन भइरहेका हुन् । उनीहरूलाई आफ्नै देशमा रोक्नु पर्ने यो परिस्थितीमा सबै कुरा बुझेका एक प्राध्यपक डाक्टरले यो क्षेत्रको समोचित विकास र प्रर्वद्धनलाई नै अवरोध पुर्याउन खोज्नु दुर्भाग्यपूर्ण रहेको छ । त्यसकारण अबका दिनमा युवा संघ नेपालले यसो हुन दिँदैन । एकजना व्यक्तिको करण त्यो पनि स्वतन्त्र रही आफ्नो सेवा प्रदान गर्नुपर्ने व्यक्तिका कारण सदन अवरुद्ध हुनुपर्ने, विधेयकलाई अप्ठेरो पर्नुपर्ने यो सम्भव र जायज कुरा होइन । डा. केसी डाक्टर, प्राध्यपक भन्दा पनि आफूलाई राजनीतिक दलको नेताको रुपमा प्रस्तुत गरिराख्नु भएको छ । चिकित्सा क्षेत्रको माध्यमद्वारा देशमा नै केहरुी गर्न खोज्ने युवाहरुलाई उहाँले अबरोध गरिरहनु भएको छ । त्यसकारण उहाँले अनसन तुरुन्त फिर्ता लिनुपर्छ । यदि फिर्ता लिनुभएन भने उहाँको गैरजिम्मेवारपूर्ण प्रवृत्तिविरुद्ध हामी कानुनी ढोका ढक्डकाउने छौँ ।

तर, डा. केसीको अनसनले सरकार घुँडा टेक्नुपर्ने अवस्था सिर्जना हुँदैछ नि !

यो सरकार घुडा टेक्न, शिर झुकाउन, असफल हुन बनेको हैन । यो देशको इतिहासकै अहिलेसम्मको जनप्रिय, लोकतन्त्रिक र विकासप्रेमी सरकार हो । आम तीन करोड नेपालीले विश्वास र भरोसाले बुहमतका साथ संघीय लोकतान्त्रिक गणतन्त्रलाई पूर्ण रुपमा स्थापित गराउदै मुलुकलाई समृद्धिको बाटोमा डोर्याउने महत्वपूर्ण ऐतिहासिक जिम्मेवारी बोकेको युगीन सरकार हो । त्यस कारण यो सरकारलाई असफल हुने अधिकार नै छैन् । गलत र वाइयत मागहरूको निमित्त यो सरकार झुक्छ भन्ने कुरामा मलाई रतिभर पनि विश्वास छैन ।

संसदमा पेश भएको चिकित्सा शिक्षा विधेयक छलफल विषयमा तपाइको के धारणा छ ?

यो पूर्णरुपमा स्वागत योग्य कार्य हो । म र मेरो संगठन चिकित्सा शिक्षा विधेयकमाथि छलफल गरेर पास हुनुपर्छ भन्ने माग राख्न चाहन्छौ । सरकारले पनि यस विधेयकसम्बन्धी जुन कानुन बनाउने कदम चालिरहेको छ, यसप्रति म व्यक्तिगत रुपमा पनि धेरै खुसी छु । डा. गोविन्द केसीले पछिल्लो समय अनसनका मागलाई अन्यन्त्र मोड्न खोज्नु भएको स्पष्ट छ । अहिलेको सरकारलाई असफल बनाउन राजनीतिक रुपमा परिचालित हुनु भएको छ । त्यसकारण अब उहाँको अनसनको पनि कुनै औचित्य छैन् । चिकित्सा शिक्षा अहिले नेपालमा विद्यार्थीहरूको पहिलो र महत्वपूर्ण रोजाई भइरहेको छ । यस्तो अवस्थामा मेडिकल कलेजलाई सरकारी तवरबाट अझै धेरै व्यवस्थित गर्दै एक प्रदेश एक मेडिकल कलेज अनिवार्य रहनु पर्ने देखिन्छ । अब भन्नुहोस्, १० वर्षसम्म मेडिकल कलेज नै खोल्न नहुने तर्क र माग कति जायज छ ?त्यसकारण डा. गोविन्द केसीको अनसनलाई अब कानुनी उपचार गरेर वहाँलाई कानुनी दायरामा ल्याउनु जरुरी देखिन्छ ।

अन्त्यमा, के भन्नु हुन्छ ?

डा. गोविन्द केसी अनसनमा हैन, चाहिदो तरिकाबाट छलफलमा आउनु पर्छ । मुलुकको समृद्धिको बाधक भएर तितो इतिहास बनाउनुको सट्टा अर्थपूर्ण निकास निकालेर मुलुकलाई अग्रगतिमा लैजानु उहाँको पनि कर्तव्य हो । उहाँ एक सरकारी डाक्टर, प्राध्यापक भएको नाताले पनि राज्य विरुद्धको आफ्नो केटाकेटीपन र सुनियोजित षड्यन्त्र छोडेर परिभाषित जिम्मेवारीमा तुरुन्त फर्कन हामी आव्हान गर्छौँ ।