मृगौला खराब पार्ने आठ प्रमुख कारण
अत्याधिक नून : नूनमा हुने सोडियमले रक्तचाप बढाउन मद्दत गर्दछ जसले मृगौला खराब बनाउँदै लैजान्छ । यसले मृगौलामा पत्थरी हुने खतरा पनि बढाउँछ जसले पिसाब फेर्दा समस्या हुने, दुख्ने र टाउको दुख्ने हुन्छ ।
पेनकिलरको प्रयोग : अधिक रुपमा पेनकिलरको प्रयोगले मृगौलालाई खराब गर्दछ । एस्पिरिन, एडभिल तथा आइब्रफेन सामान्यतया प्रयोग हुने पेनकिलर हुन् । सामान्य चिकित्सकको सल्लाहमा सेवन गर्दा यो सुरक्षित हुन्छ । तर, अत्यधिक रुपमा यसको प्रयोग गर्दा मृगौला खराब हुन जान्छ र मृगौलाले काम गर्न छाड्छ ।
अधिक मासुको प्रयोग : मासु सबैलाई मनपर्छ । सीमित मात्रामा खानु स्वास्थ्यका लागि फाइदाजनक नै हुन्छ । तर, मासु धेरै खानु मृगौलाको लागि एकदमै हानिकारक मानिन्छ । मासुमा राम्रो मात्रामा प्रोटिन हुन्छ । तर, मासुमा हुने प्रोटिनले रगतमा अम्लको मात्रा बढाउँदछ । जसका कारण मृगौलाले उक्त अम्लका कारण राम्रोसँग काम गर्न सक्दैन ।
कम पानी पिउनु : पानीले मृगौलाको कार्यक्षमता राम्रो राख्दछ । यही प्रक्रियाबाट नै शरीरको फोहोर र विकारयुक्त चिज शरीरबाट निस्कने गर्दछ । शरीरमा पानीको मात्रा कम हुँदा मृगौला खराब हुन सक्छ ।
प्रशोधित खानेकुरा : प्रशोधित तयारी खानेकुराहरूमा उच्च मात्रामा सोडियम र फोस्फोरस हुने गर्दछ । सोडियमको बारेमा हामीले जानिसक्यौं । फोस्फोरस हाम्रो हाड र मृगौला दुवैका लागि घातक छ ।
अधिक अल्कोहल : अधिक मात्रामा अल्कोहलको सेवनले पनि मृगौला खराब गर्दछ । यदि मृगौला स्वस्थ भएको व्यक्तिले सीमित मात्रामा अल्कोहल सेवन गर्नु स्वास्थ्यका लागि त्यति खराब मानिदैन । तर, मदिरा धेरै सेवन गर्न थालियो भने यसले मृगौलासम्बन्धी रोगको खतरा बढाउँछ ।
धुम्रपान : यदि तपाई अत्यधिक चुरोट पिउनुहुन्छ भने घातक मृगौलाको समस्या हुन्सक्छ । धुम्रपानले रक्तचाप र टाइप २ मधुमेहको खतरा बढाउँछ, जुन मृगौला रोगका प्रमुख दुई कारण हुन् । यसले मृगौलामा रगतको प्रवाह पनि न्यून बनाउँछ ।
पेय पदार्थको प्रयोग(सोडा) : हालै भएको एक अध्ययनले खाने सोडा र मृगौलाको समस्याबीच प्रत्यक्ष सम्बन्ध पुष्टि गरेको छ । ३ हजार महिलामा गरिएको अनुसन्धानले यो पुष्टि भएको हो । दैनिक दुई वा तीनवटा सोडाको सेवन गर्ने महिलाको किड्नीको कार्यक्षमतामा ३० प्रतिशतले कमी आएको थियो ।
प्रकाशित मिति: ३० पुस २०७५, सोमबार
