करमा स्थलगत अनुगमन थालियो, विवादित स्थानीय तहमा जाने

काठमाडौं, भदौ ५
स्थानीय तहमा लगाइएका करसम्बन्धमा सरकारले गठन गरेको उच्चस्तरीय समितिले सोमबारदेखि अध्ययन सुरु गरेको छ।

सरकारले संघीय मामिला तथा सामान्य प्रशासन मन्त्रालयका सचिव दिनेशकुमार थपलियाको संयोजकत्वमा गठित समितिले अध्ययन सुरु गरेको हो ।

समितिमा राजस्व सचिव शिशिर ढुंगाना र वित्त आयोगका सचिव बैकुण्ठ अर्याल छन् । समितिको सोमबार बसेको पहिलो बैठकले धेरै कर तोकेका र विवादित स्थानीय तहमा स्थलगत अध्ययन गर्ने निर्णय गरेको छ।

बैठकमा स्थानीय तहले कार्यपालिकाको निर्णयविपरीत आफूखुसी कर बढाएको, आर्थिक ऐन पनि आफूखुसी संशोधन गरेको तथा जिल्ला समन्वय समितिले अधिकार क्षेत्र बाहिर गएर कर उठाइरहेको लगायत विषयमा गम्भीर छलफल भएको थियो।