डा. गोविन्द केसीलाई आज काठमाडौं ल्याउने
काठमाण्डौँ, साउन ३
सत्तारुढ दल नेपाल कम्युनिष्ट पार्टीले जुम्लामा अनसनरत डा. गोविन्द केसीलाई आज काठमाडौं ल्याउने निर्णय गरेको छ । नेकपाको गएराती बसेको आकस्मिक बैठकले डा. केसीको जीवनरक्षा पहिलो प्राथमिकता भएको भन्दै आज नै हेलिकोप्टरबाट काठमाडौं ल्याउन पहल गर्ने निर्णय गरेको हो ।
उहाँका मागबारे काठमाडौंमै बसेर गम्भीर छलफल गर्ने बैठकले निर्णय गरेको छ । १९ दिनदेखि अनसन बसेका डा. केसीको स्वास्थ्य अवस्था गम्भीर भए पनि सरकारले चासो नदिएको आरोप लागिरहेको छ ।
चिकित्सा शिक्षा अध्यादेशअनुसार विधेयक ल्याउनु पर्ने लगायतका माग राखेर डा. केसी जुम्लामा अनसनरत हुनुहुन्छ । यसबीचमा उहाँका प्रतिनिधिसँग सरकारले वार्ता गरे पनि सहमति हुन सकेको छैन ।
प्रकाशित मिति: ३ श्रावण २०७५, बिहिबार