विश्वकप फुटबलमा आज चार खेल
काठमाडौं, असार १२
विश्वकप फुटबलमा आज पनि चार खेल हुनेछन् । आज समूह सि र डि का अन्तिम चरणका लिग खेल हुनेछन् । नेपाली समय अनुसार वेलुकी पौने ८ बजे फ्रान्स र डेनमार्क तथा अष्ट्रेलिया र पेरु भिड्नेछन् ।
फ्रान्स समुहमा लगातार दुई खेल जित्दै राउण्ड अफ सिक्सटिनमा छनोट भइसकेको छ भने ४ अंक जोडेको डेनमार्कलाई अर्को चरणको यात्रा पक्का गर्न आजको खेल कम्तिमा बराबरीमा सकाउनुपर्नेछ ।
डेनमार्क पराजित भएको अवस्थामा भने समूहको अर्को खेलको नतिजा निर्णायक हुनेछ । समुहको अर्को खेलमा अस्ट्रेलिया र पेरु भिड्नेछन् । अष्ट्रेलियाको १ अंक छ भने पेरु अंकविहीन अवस्थामा रहेको छ ।
आजै राति पौने १२ वजे अर्जेन्टिना र नाईजेरिया तथा आईसल्याण्ड र क्रोएसिया भिड्नेछन् । २ खेलबाट ६ अंक जोडेको क्रोएसिया राउण्ड अफ सिक्सटिनमा पुगिसकेको छ ।
३ अंक जोडेको नाईजेरिया तथा १/१ अंक जोडेका आईसल्याण्ड र अर्जेन्टिना पनि अर्को चरणमा पुग्ने होडमा जिवित छन् । अर्को चरणमा पुग्न अर्जेन्टिनाले आजको खेलमा नाईजेरियालाई हराउनुपर्नेछ । अर्को खेलमा आईसल्याण्ड क्रोएसियासँग पराजित वा कम्तिमा बराबरीमा रोकिनुपर्नेछ ।
अर्जेन्टिना र आईसल्याण्ड दुबै टोली विजयी भएको अवस्थामा गोल अन्तरको आधारमा एक टोली छनोट हुनेछ । नाईजेरिया विजयी भएको अवस्थामा भने ऊ सोझै राउण्ड अफ सिक्स्टिनमा पुग्नेछ । यसको अर्थ अर्जेन्टिना र आईसल्याण्ड समुह चरणबाटै बाहिरिनेछन् ।
प्रकाशित मिति: १२ असार २०७५, मंगलबार
