नेतृत्वविहीन सात नम्बर प्रदेशको प्रमुख प्रतिपक्ष दल, अाकांक्षी धेरै
अंकुश कुँवर/धनगढी, वैशाख ४
प्रदेश नम्बर ७ मा सरकार गठन भएको दुई महिना भइसक्दा पनि प्रमुख प्रतिपक्ष दल नेपाली कांग्रेसले अझैसम्म संसदीय दलको नेता छनोट गर्न सकेको छैन ।
संसदीय दलको नेताका लागि आकांक्षी धेरै भएपछि कांग्रेसले नेता छान्न नसकेको बुझिएको छ । जसले गर्दा प्रमुख प्रतिपक्ष दल नै नेतृत्वविहीन बनेको छ ।
सरकारको सही काममा सहयोग र गलत काममा खबरदारी गने भूमिकामा प्रतिपक्षी दल रहने भएपनि संसदीयको नेता छान्न नसक्दा कांग्रेस आफै अन्योलमा परेको छ । १२ जना मात्रै सदस्य रहेको नेपाली कांगे्रसमा दलको नेताका लागि भरत खड्का, कर्ण मल्ल, डा. रणबहादु्र रावल, डिल्लीराज पन्त आकांक्षी देखिएका छन् ।
आपसी सहमतीमा नेता चुन्न नसकिएपछि पार्टी नेतृत्वलाई अनुरोध गरिएको छ । तर, पार्टी नेतृत्वले पनि अझैसम्म नेता छान्न सकेको छैन । संसदीय दलका नेताका आकांक्षी सांसद भरत खड्काले नेता छनोटका लागि पार्टी नेतृत्वलाई आग्रह गरिएको बताए ।
पार्टीमा १२ जना सदस्यहरु मध्ये डोटीबाट निर्वाचित सांसद खड्का पार्टीमा बरिष्ठ मानिन्छन् । यस कारण पनि उनले आफू अनुभवी भएकाले आफूलाई संसदीय दलको नेतामा बनाउनुपर्ने दाबी गर्दै आएका छन् । प्रतिपक्षी दलको नेताले ५९ हजार मासिक तलव, आवास र गाडीको सुविधा छ ।
प्रकाशित मिति: ४ बैशाख २०७५, मंगलबार