वैशाख ९ गते नै घोषणा गर्नुपर्ने एमालेको निष्कर्ष
काठमाडौं, वैशाख ४
नेकपा एमालेको स्थायी कमिटीको बैठकले नेकपा माओवादी केन्द्रसँगको एकतालाई सकेसम्म वैशाख ९ गते नै घोषणा गर्नुपर्ने निस्कर्ष निकालेको छ ।
दुई पार्टीले गठन गरेका संगठन र वैचारिक कार्यदलले प्रतिवेदन दिइसकेको र नेपाल कम्युनिष्ट पार्टी स्थापना दिवस वैशाख ९ गते नै एकता गर्न सुझाइएको भन्दै एमाले स्थायी कमिटीले कार्यदलको प्रतिवेदन अनुसार अघि बढ्न भनेको हो ।
स्थायी कमिटी सदस्य सुवास नेम्वाङका अनुसार एकताका लागि गर्नुपर्ने आन्तरिक तयारी पूरा गरेर ढिलो नगरी अधिकतम सहमति गरी एकता घोषणा गर्नुपर्ने नेताहरुको जोड छ ।
प्रधानमन्त्री एवं एमालेका अध्यक्ष केपी शर्मा ओली हिजो दिनभर अन्य कार्यक्रम स्थगन गरी एकता प्रक्रियासम्बन्धी छलफलमा जुट्नुभएको थियो ।
उहाँले बिहान केन्द्रका अध्यक्ष पुष्पकमल दाहाल प्रचण्डसँग भेटवार्ता गर्नुभएको थियो । दुई दलबीचको एकता संयोजन समितिको बैठक आज बिहान राखिएको छ ।
संयोजन समितिले प्रतिवेदनमा सहमति हुन बाँकी देखिएको एकताको मिति, घोषणा प्रक्रिया, एकतामा सांगठनिक अनुपात, जनयुद्धबारेको विश्लेषणबारेमा निक्र्याैल गर्नुपर्नेछ । रासस
प्रकाशित मिति: ४ बैशाख २०७५, मंगलबार
