यसरी शुरु भयो गाईजात्रा (हेर्नुहोस् फोटो-भिडियो)
भोजपुर, भदाै १३
आइतवारवाट गाईजात्रा पर्व शुरु भएको छ । श्रावण शुक्ल पूणिर्मादेखि मनाइने गाईजात्रा पर्व आठ दिनसम्म मनाइन्छ । गाईजात्रा पर्व काठमाडौँ उपत्यका सहित मुलुकका मुख्य मुख्य सहरमा मनाउने गरिन्छ ।
यो वर्ष मृत्यु भएका आफन्तको सम्झनामा गाई सिँगारी सहर घुमाएर पर्व मनाउने गरिन्छ । गाईलाई घुमाउने क्रममा श्रद्धालु भक्तजनले दूध, फलफूल, रोटी, दहीचिउराका साथै अन्य परिकार पनि खुवाउँछन् ।
किंवदन्ती अनुसार राजा प्रताप मल्लका पुत्रको अल्पायुमै निधन भएपछि रानीले धेरै बिलौना गर्न थालिन् । लामो समयसम्म शोक गरेर बसेपछि ‘यस्तो शोक तिमीलाई मात्र परेको होइन’ भन्ने देखाउन राजाले वर्ष दिनभित्र दिवङ्गत सबैको गाईजात्रा निकाल्न लगाए ।
सबैका घरबाट गाईभेषधारी आएकाले सबै मानिसको मृत्यु हुने देखेपछि मात्र रानीको शोक केही घट्दै गयो भन्ने जनविश्वास छ । राजाले आआफ्ना मरेका व्यक्तिका नाममा गाईजात्रा निकाली सहर परिक्रमा गराउनू भनी दिएको आज्ञाका आधारमा नै अहिलेसम्म गाईजात्रा पर्व चलेको विश्वास गरिन्छ ।
यो चलन चलाउँदा पनि रानी पूर्ण रूपमा सन्तुष्ट हुन नसकी शोक नै गरिरहेकाले त्यही समयबाट हास्यव्यङ्ग्यात्मक कार्यक्रम पनि सुरु भयो भन्ने अर्को भनाइ पनि छ । यस अवसरमा विभिन्न हास्य समूहले हप्ता दिनभन्दा बढी गाईजात्रा कार्यक्रम चलाउँछन् ।
काठमाडौँ उपत्यकासहित भोजपुर, बनेपा, धुलिखेल, पनौती, बाह्रबिसे, त्रिशूली बजार, तानसेन, दोलखा, खोटाङ, रामेछाप लगायतका ठाउँमा पनि गाईजात्रा मनाउने गरिन्छ ।
भिडियो
प्रकाशित मिति: १३ भाद्र २०७२, आइतबार
