फिलिपिन्समा बस दुर्घटना, २० जनाको मृत्यु
मनिला, १० पुस
उत्तरी फिलिपिन्समा क्रिसमस पर्व मनाउन गइरहेको एउटा बस दुर्घटना हुदाँ कम्तीमा २० व्यक्तिको मृत्यु भएको छ ।
क्रिस्मस मनाउनका लागि गइरहेको एउटा संयुक्त परिवारका २० व्यक्ति रहेको सो बस विपरीत दिशाबाट आएको अर्काे बससँग ठोक्किँदा सो दुर्घटना भएको हो ।
आगी सहरमा क्रिस्मसको उपलक्षमा चर्चतर्फ गइरहेको सो सानो बसलाई ठूलो बसले ठक्कर दिएको प्रत्यक्षदर्शीले जनाएका छन् । सानो बसमा रहेका २० व्यक्तिको मृत्यु भएको थियो । यस घटनामा ज्यान गुमाउनेमा छ बालबालिकासमेत रहेका छन । सानो बसका नौ जना र ठूलो बसका १७ व्यक्ति घाइते भएका क्षेत्रीय प्रहरीले दिएको पछिल्लो जानकारीमा जनाइएको छ ।
फिलिपिन्सको आगी सहर राजधानी मनिलाबाट २ सय किलोमिटर उत्तरीतर्फ रहेको बताइएको छ । फिलिपिन्समा दावाओ सिटीमा शनिबार एउटा सपिङ मलमा भएको आगलागीमा परी ३७ जनाको मृत्यु भएको थियो । त्यसलगत्तै आज फेरि यो अर्काे दुर्घटना भएको छ ।
उता शुक्रबार आएको ‘टेम्बिन’ नामक आँधीमा परी मृत्यु हुनेहरुको सङ्ख्या २४० पुगेको सरकारी अधिकारीहरुले सोमबार जानकारी दिएका छन् । प्राप्त अर्काे एक समाचारमा उक्त प्रकोपको पनि खतरा नघटेको बताइएको छ । फिलिपिन्सको दोस्रो ठूलो टापूका रुपमा चिनिने मिन्दानाओमा आएको आँधीका कारण मृत्यु हुनेको संख्या सोमबार २४० नाघेको अधिकारीहरुले जनाएका छन् ।
साथै अझै पनि सयौं व्यक्ति बेपत्ता भएका अधिकारीले जानकारी दिएका छन् । उक्त आँधीमा परी बेपत्ता रहेका दर्जनौँ व्यक्ति अब भेटिने सम्भावना कमै रहेको पनि अधिकारीहरुले जनाएका छन् । यस आँधीका कारण ५० हजारभन्दा बढी सर्वसाधारण घाइते भएका छन् भने सयौँ घर ध्वस्त भएका तथा कतिपय त गाउँ नै बाढीले बगाएको पनि जनाइएको छ ।
यसरी गएको शुक्रबारदेखि फिलिपिन्समा आएको निरन्तर रुपमा प्राकृतिक प्रकोप र दुर्घटनापछि संयुक्त राष्ट्रसंघका महासचिव एन्टोनियो गुथ्रेसले पनि दुःख व्यक्त गर्नुभएको थियो ।
प्रकाशित मिति: १० पुस २०७४, सोमबार
