युएईमा मृत्युसँग लड्दै नेपाली चेली
युएई (अलऐन), साउन ३०
बैदेशिक रोजगारीका लागि संयुक्त अरब एमिरेट्स युएईको अलऐन आएकी एक नेपाली महिला प्यारालाइसिसका कारणअस्पतालमा मृत्युसँग संघर्ष गर्दै छिन् । रोजीरोटीका लागि युएईको एमएबी क्लिनिङ कम्पनीमा क्लिनरको रुपमा काम गर्न आएकी काभ्रे कुपिन्टारकी सोममाया तामाङ गोले यतिबेला युएईको अलऐनमा रहेको अस्पतालमा उपचाररत छिन् ।
तीन महिना पहिले स्वास्थ्य समस्या देखिए पछि गोलेलाई अलएेनमा रहेको अलजिमी अस्पताल लगिएको थियो । अस्पतालले प्यारालाइसिस भएको प्रमाणित गरेपछि उहाँको अहिले त्यहि उपचार भइरहेको छ ।
ठूलो सपना बोकेर परिवार, आफन्त र देश छोडेर बिदेशिएकी सोम माँयाको सपना अहिले अस्पतालको बेडमा सिमित भएको छ । शरीरको माथिल्लो कुनै पनि भागले काम गरेको छैन, न बोल्न सक्छिन् न कुनै ईशारानै ।
उपचारका लागि सहयोग जुटाउन आवश्यक भएको उनलाई भेटेर आएपछि तामाङ समाज युएईका केन्द्रिय सदस्य सुनिल लामाले बताए । यतिबेला उनको स्वास्थ्यस्थिती नाजुक रहेको र दैनिक कम्पनीमा काम गर्न सक्ने अवस्था नभएकोले आश्रित परिवारकोसमेत गर्जो टार्न समस्या छ ।
गोलेको अहिलेसम्म उपचार खर्च कम्पनीले नै ब्यहोरेको छ । उनको उपचारमा ३ लाख युएई दिराम खर्च भई सक्दा पनि निको नभएपछि कम्पनीले नेपाल पठाउने तयारी गरेको छ ।
परिवारमा आर्थिक समस्या भएकोले परिवारकी जेठी छोरी उनी उमेर बढाएको पासपोर्ट बोकेर युएई गएकी थिईन् । गोलसँगै काम गर्ने साथीहरुले काभ्रेमा रहेका परिवारलाई उहाँको स्थितिका बारेमा जानकारी गराइसकेका छन् ।
उज्यालो अनलाइनको सहयोगमा
प्रकाशित मिति: ३० श्रावण २०७२, शनिबार
