यी हुन् आफ्नै क्षेत्र जोगाउन नसक्ने शीर्ष नेता, जसले वडासमेत गुमाए

काठमाडौं, असोज ६
केन्द्रीय राजनीतिमा हाबी रहेका मुख्य दलका शीर्ष नेता स्थानीय निर्वाचनमा भने आफ्नै गाउँ÷नगरपालिकामा कमजोर देखिएका छन् । पूर्वप्रधानमन्त्री माधवकुमार नेपालदेखि कांग्रेस नेता विमलेन्द्र निधिसम्म आफ्नै गाउँ÷नगरको वडामा कमजोर देखिएका हुन् । आजको अन्नपूर्णमा खबर छ ।

शीर्ष नेताहरू आफैंले मतदान गरेका वडामा आफ्ना उम्मेदवारलाई जिताउन असफल भएका छन् । केही नेता भने आफ्नो वडामा मात्रै होइन, गाउँ/नगरकै प्रमुख पदमा समेत पार्टीका उम्मेदवारलाई जिताउन सफल भएका छन् । तर, यस्ता नेता आंशिक मात्रै छन् ।

पूर्वप्रधानमन्त्री माधव नेपालको गृहक्षेत्र हो, रौतहट गौर नगरपालिका–२ । त्यहाँको वडामा राजपा उम्मेदवार राकेशकुमार झाले चुनाव जितेका छन् । झाले एमालेका उम्मेदवार रामपरीक्षण राय यादवलाई २ सय २३ मतान्तरले पराजित गरे ।

कांग्रेस नेता विमलेन्द्र निधिले मतदान गरेको वडामा पनि त्यस्तै अवस्था रह्यो । धनुषाको नगराइन नगरपालिका– २ मा निधिले मतदान गरेका थिए तर, त्यहाँ एमालेका वडाध्यक्ष उम्मेदवार नरेश यादवले प्यानलसहित जितेका छन् । एमाले नेता नागेन्द्र चौधरी पनि आफ्नै वडा जिताउन नसक्ने नेतामा पर्छन् ।

पर्सा पटेर्वा सुगौली गाउँपालिका–४ घर भएका चौधरीको वडामा नेपाल लोकतान्त्रिक फोरमले जितेको छ । लोकतान्त्रिक फोरमका राजेश्वर महतो थारू ५३५ मत ल्याएर विजयी भए । गाउँपालिका अध्यक्षमा भने एमालेकै हरिनारायण चौधरी विजयी भएका छन् ।

कांग्रेस नेता सरसफाइमन्त्री महेन्द्र यादवले पनि आफ्नो गाउँपालिकाको वडामा पकड जमाउन सकेनन् । धनुषाको लक्ष्मीनियाँ गाउँपालिका( ३ मा राजपाका तेजुकमार यादव विजयी भएका छन् । उनले कांग्रेसका महानन्द यादवलाई पराजित गरेका हुन् ।

यी नेताले जोगाए वर्चस्व
आफ्नो गाउँ–वडामा हार्ने मात्रै छैनन्, जिताउने नेता पनि छन् । माओवादीका प्रदेश २ का इन्चार्ज मातृका यादव, स्वास्थ्यमन्त्री गिरिराजमणि पोखरेल, एमालेका २ नम्बर प्रदेश संयोजक सत्यनारायण मण्डललगायत नेताले भने आफ्नो गाउँ र वडामा पार्टी उम्मेदवारलाई जिताउन सफल भएका छन् ।

माओवादी नेता मातृका यादवको गृहक्षेत्र धनुषा, सर्बेला नगरपालिका– २ हो । मातृकाको वडामा माओवादी केन्द्रले जितेको छ । नगरपालिकामा पनि माओवादीले बलियो पकड बनाएको छ ।

स्वास्थ्यमन्त्री गिरिराजमणि पोखरेलले यसपटक नै आफ्नो निर्वाचन क्षेत्र रहेको महोत्तरी, बर्दिवास नगरपालिका– ३ मा मोरङबाट मतदाता नामावली सारेर ल्याएका थिए । उक्त वडामा माओवादीकै राजनप्रसाद ढुंगाना विजयी भएका छन् ।

एमाले २ नम्बर प्रदेशका संयोजक हुन्, सत्यनारायण मण्डल । उनी सप्तरीको सप्तकोसी नगरपालिका(११ का मतदाता हुन् । उनको गृहक्षेत्र सप्तकोसी नगरपालिकाको प्रमुख, उपप्रमुखमा एमाले उम्मेदवारले जितेका छन् । मण्डलको वडा सप्तकोसी-११ मा पनि एमाले उम्मेदवार विजयी भएका छन् ।

प्रभु साहको गृहक्षेत्र रौतहट मौलापुर नगरपालिकामा माओवादीबाट उनकै श्रीमती रिनाकुमारी साह विजयी भएकी छन् । उनले मतदान गरेको मौलापुर(५ मा पनि माओवादीकै उम्मेदवारले विजय प्राप्त गरेका छन् ।

राजपा नेता महन्थ ठाकुर, राजेन्द्र महतो, अनिल झा, माओवादीकी उर्मिला अर्याल, कांग्रेसका फरमुल्लाह मन्सुरलगायतको वडामा भने मतगणना बाँकी नै छ । कांग्रेसको अग्रता कायमै २ नम्बर प्रदेशको स्थानीय निर्वाचनअन्तर्गत ३० तहको निर्वाचन परिणाम सार्वजनिक भएको छ ।