काले–काले मिलेर खाउँ भाले, आउट भए सागर आले
काठमाडौं, भदौ २३
एपी वान टेलिभिजनबाट प्रसारण भइरहेको नेपालको चर्चित रियालिटी शो नेपाल आइडलबाट चितवनका सागर आले आउट भएका छन् ।
आलेको टप–४ बाटै नेपाल आइडलको यात्रा समाप्त भएको हो । आलेलाई कार्यक्रमा काले–काले मिलेर खाउँ भाले, आउँदैछन् सागर आले भनेर पर्फमेन्सका लागि बोलाउने गरिएको थियो ।
गत हप्ता भएको कार्यक्रमको भोटको आधारमा सागर आउट भएका हुन् । नेपाल आइडलको ग्राण्ड फिनालेमा निशान भट्टराई, बुद्ध लामा र प्रताप दास पुगेका छन् ।
ग्राण्ड फिनाले कतारको राजधानी दोहामा सेप्टेम्बर २२ अर्थात असोज ६ गते हुँदैछ । त्यहीबाट नेपालले प्रथम नेपाल आइडल पाउँदैछ ।
नेपाल आइडलले महिन्द्राको कारसँगै २० लाख नगद पुरस्कार पाउनेछ । त्यस्तै फस्ट रनअरअपले १५ लाख र सेकेण्ड रनअरअपले १० लाख नगद पुरस्कार पाउँदैछन् ।
दोहामा हुने ग्राण्ड फिनालेको तयारी तिब्र भएको छ । ग्राण्ड फिनालेका लागि कलाकारहरुको टुंगो समेत लागेको छ ।
नेपाल आइडलको अफिसियल फेसबुक पेजमा राखिएको सूचना अनुसार नारद खतिवडा, नलिना चित्रकार, हेमन्त राना, र तेरिया मगर दोहाको कार्यक्रममा हुनेछन् । त्यस्तै नेपाल आइडलका टप–१२ प्रतिस्पर्धी समेत हुनेछन् ।
को हुन् सागर आले ?
प्लस टु गरेका सागर आले मगरले नेपाल आइडलमा उत्कृष्ट ४ सम्मको यात्रा तय गरे भने यहीबाट नेपाल आइडलको उनको यात्रा समाप्त भएको छ । चितवनका २० वर्षीय मगर सबै प्रकारका गीत सुन्न र गाउन मन पराउँछन् ।
अहिलेसम्म औपचारिक रूपमा संगीत नसिके पनि उनको गायन कौशल र स्वर लोभलाग्दो थियो । नेपाल आइडलमा आएर आफूले संगीतसम्बन्धी धेरै कुरा सिकेको उनको भनाइ छ ।
उनी भन्छन्– परिवारमा सांगीतिक वातावरण भएकाले यस क्षेत्रमा आकर्षित भएको हुँ । सागरले नेपाल आइडलका लागि नारायणगढबाट अडिसन दिएका थिए ।
सबै प्रकारका गीत सुन्न र गाउन रुचाउने सागर आलेमगरलाई नारायण गोपाल, ज्ञानु राणा, तारा थापा, भक्तराज आचार्य एवं एड्रियन प्रधानको स्वर मन पर्छ ।
नेपाल आइडलको अन्तिम चरणसम्म पुग्नेमा आशावादी बनेका आले कम भोटका आधारमा आज बाहिरिएका हुन् ।
प्रकाशित मिति: २३ भाद्र २०७४, शुक्रबार
