कोरियामा नेपाली साहित्य चर्चा

काठमाडौँ, साउन ५

युरेसिया कल्चरल फोरम, दक्षिण कोरियाको आयोजनामा सोलमा अन्तर्राष्ट्रिय साहित्यिक सम्मेलन सम्पन्न भएको छ ।

सम्मेलन कोरियाको म्यंजी छन्मुन विश्वविद्यालयमा भएको थियो । आयोजक संस्था युरेसियाका अध्यक्ष होंग थे सिगको अध्यक्षतामा सम्पन्न उक्त कार्यक्रममा नेपालबाट नेपाली लेखक सङ्घका अध्यक्ष कवि तथा प्राज्ञ श्रवण मुकारुङ र महासचिव रत्नमणि नेपालको विशेष आतिथ्य रहेको थियो ।

सम्मेलनमा कोरिया, नेपाल, उज्वेकिस्तान र मलेसिया गरी चार देशको सहभागिता थियो । कार्यक्रममा सहभागी देशका अतिथिहरुले कार्यपत्र गरेका थिए ।

नेपालबाट दुई कार्यपत्र प्रस्तुत गरिए । श्रवण मुकारुङले नेपाली साहित्य र विशेष गरी मातृभाषा साहित्यका बारेमा प्रकाश पारे भने रत्नमणि नेपालले पूर्वीय सभ्यतामा अंकको अर्थ, महत्व र प्रयोगका बारेमा कार्यपत्र प्रस्तुत गरेका थिए ।

नेपालले १ भनेको ब्रह्मा अथवा शून्य, ० को अर्थ भ्रम अथवा मायामोह र ८ को अर्थ सजीव वा निर्जीव वस्तु भनेर १०८ अंकबारे प्रकाश पारेका थिए ।

कोरियाका तर्फबाट दानकुक विश्वविद्यालयकी से युङ नाले ‘आधुनिक कोरियन उपन्यासमा समाजका उपेक्षित पक्षको चित्रण’ विषयक कार्यपत्र प्रस्तुत गरेकी थिइन् ।

यसै गरी कोरियाकै सिनहान विश्वविद्यालकी हवाङ येङ युङले केरियाली उपन्यासकार हाङ काङका उपन्यासहरूमाथि कार्यपत्र प्रस्तुत गरेकी थिइन् ।

कार्यक्रममा मलेशियाका तर्फबाट मलाया विश्वविद्यालका प्रा. माहम्मद माख्तर अबु हसनले मले साहित्यको व्यवस्थापन विधिबाट विश्लेषण प्रस्तुत गरे ।

कोरियाको हानकुक विश्वविद्यालयकी ली यीवनले मलेसियाको समकालीन साहित्यबारे कायपत्र प्रस्तुत गरिन् ।

यसै गरी कार्यक्रममा उज्वेकिश्तानकी सिन्स्काइ विश्वविद्यालकी अन्तनिया पाकले उज्वेकिश्तानमा कोरियन संस्कृति र कलाको प्रसार र परिवर्तन विषयक कार्यपत्र प्रस्तुत गरिन् ।

प्र्रस्तुत कार्यपत्रहरूमाथि कोरियाका प्राध्यापकहरूद्वारा टिप्पणी गरिएका थिए । कार्यक्रममा विदेशी पाहुनाहरूलाई स्वागत गर्दै फोरमका सचिव जंग दे गीले कार्यक्रमबारे प्रकाश पारेका थिए ।

कार्यपत्र प्रस्तुतिपछि सम्पन्न काव्यउत्सवमा उपस्थित कविहरुले आ–आफ्नै देशको भाषामा कविता वाचन गरेका थिए ।

सम्मेलनको समापन गर्दै युरेसिया कल्चरल फोरमका अध्यक्ष होंग थे सिगले कुनै एउटा देशको मानिसले अर्को देशको मानिसको भावना र उसको विचार बुझ्न साहित्य नै एक मात्र माध्यम हुने विचार व्यक्त गर्दै एकले अर्को देशको सामाजिक सांस्कृतिक पाटो बुझ्नका लागि साहित्यको आदानप्रदान गर्नुपर्नेमा जोड दिए ।

सम्मेलनमा सहभागिता जनाएर बिहीबार काठमाडौँ फर्केका कवि मुकारुङले नेपाली साहित्यलाई कोरियाका अतिरिक्त युरेसिया मुलुकमा चिनाउने एउटा राम्रो अवसरको रुपमा सम्मेलन सफल रहेको बताए ।