पारससहितका तीन दर्जन बढी खेलाडीलाई सशस्त्रले हटायो, यस्तो छ कारण

काठमाडौं, जेठ २२
नेपाल क्रिकेटका कप्तान पारस खड्कासहित तीन दर्जन बढी खेलाडीलाई हटाएको छ। खेलकुद कोष रितिएर तलब दिन नसकेपछि सशस्त्र प्रहरी बलले ५० खेलाडी तथा प्रशिक्षकको करार सम्झौता रद्द गरेको हो। आजको नयाँ पत्रिकामा खबर छ।

आर्थिक स्रोतको समस्या भएकै कारण करार सम्झौता नवीकरण हुन नसकेको सशस्त्र प्रहरीका प्रवक्ता डिआइजी दिवाकर केसीले बताए।

प्रायोजक नपाएको र अन्य स्रोत पनि नभएपछि तलब दिन नसकिएको उनको भनाइ छ ।

सशस्त्रले क्रिकेटर पारस खड्कासहित देशका चर्चित खेलाडीलाई मासिक तलब दिएर आफ्नो विभागीय क्लबमा अनुबन्धित गरेको थियो ।
करार रद्द गरिएका अन्य खेलाडीहरुमा सुशीलनरसिंह राणा, दीपक श्रेष्ठ, प्रकाश थपलिया, विश्व श्रेष्ठ, रमेश डंगोल, अञ्जन विष्ट, राजु योगी, मनमाया लिम्बु, अञ्जली योञ्जन, ज्ञानेन्द्र मल्ल, शक्ति गौचन, वसन्त रेग्मी, सुवाक खकुरेल, पृथ बाँस्कोटा, सन्दीप लामिछाने, करण केसी, आरिफ शेख, सन्दीप सुनार, सन्दीप जोरा, अनिल शाहलगायत छन् ।