एकै दिनमा ३ हजार बढी पैदल यात्रुलाई कार्वाही, कति उठ्यो राजस्व ?

कठमाडौं, जेठ १७

महानगरीय ट्राफिक प्रहरी महाशाखाले मंगलबारदेखि नै उपत्यकामा पैदल यात्रु सुरक्षा अभियान लागू गरेकै दिन ३ हजार बढी यात्रुलाई कार्वाही गरेको छ ।

पहिलो दिनमै ३ हजार ३ सय पैदल यात्रुलाई कार्वाही गरेको महाशाखाले जनाएको छ । प्रहरीले यस सम्बन्धि करिब डेढ महिना जनचेतनामुलक कार्यक्रम समेत सञ्चालन गरेको थियो । आजको नयाँ पत्रिकामा खबर छ ।

महानगरीय ट्राफिक प्रहरी महाशाखाका डिआइजी मिङमार लामाका अनुसार काठमाडौं, ललितपुर र भक्तपुरमा जथाभावी सडक पार गर्ने ३ हजार ३ सय ४८ पैदल यात्रु कारबाहीमा परेका हुन् ।

 

४२ हजार राजश्व संकलन

पैदल यात्रु सुरक्षा अभियान नियम लागू भएको पहिलो दिनमै कारबाहीबाट ४२ हजार ४ सय बढी राजश्व संकलन भएको छ । महाशाखाका अनुसार जेब्रा क्रसिङबाहेक जथाभावी सडक पार गर्ने २ हजार एक सय २० पैदल यात्रुबाट जनही २ सयका दरले राजश्व असुल गरिएको छ ।

जरिवाना तिर्न नसकेका १ हजार २ सय २८ पैदल यात्रुलाई सडक सुरक्षा कक्षा लिएपछि छाडिएको डिआइजी लामाले बताए । उपत्यकामा सबै भन्दा बढी काठमाडौंमा पैदल यात्रु कारबाहीमा परेका छन् । काठमाडौंको दरबारमार्गमा २ सय ४० र नयाँ बसपार्क क्षेत्रमा २ सय २१ जना कारबाहीमा परेका छन् ।

पैदल यात्रुमा धेरै लापरवाही

जनचेतनापछि पनि पैदल यात्रु सचेत नभएको डिआइजी मिङमार लामाले बताए । ‘करीब डेढ महिना जनचेतना अभियान चलाउदा पनि पैदल यात्रुमा धेरै लापरवाही देखिएको छ’, डिआइजी लामाले भने, ‘त्यतिधेरै सचेत पार्दा पनि एकै दिनमा धेरै संख्यामा कारबाहीमा पर्नुले पैदलयात्रुको लापरवाही पुष्टि गर्छ ।’

महानगरीय ट्राफिक प्रहरीले उपत्यकालाई हर्न नषिेधित क्षेत्र बनाउन सफल भएपछि पैदल यात्रु सुरक्षा अभियानको नियम कार्यान्वयन गरेको हो । १ बैशाखदेखि उपत्यकालाई हर्न निषेधित क्षेत्र घोषणा गरिएको थियो । त्यसको १५ दिनपछि पैदल यात्रु सुरक्षा अभियान लागू गर्न सचेतना अभियान थालिएको थियो ।