सप्तरी घटनामा सरकारको निर्णय : मृतकलाई १० लाख, घाइतेको नि:शुल्क उपचार

काठमाडाैं, फागुन २६

सरकारले सप्तरीमा प्रहरीको गोली लागेर ज्यान गुमाउने चार जनाको परिवारलाई १०–१० लाख रुपैयाँ राहत दिने भएको छ । सिंहदरबारमा बुधबार बसेको मन्त्रीपरिषदको बैठकले मृतकका परिवारलाई राहत दिने निर्णय गरेको हो ।

यस्तै बैठकले सप्तरी घटनामा घाइते भएका सबै घाइतेको निःशुल्क उपचार गर्ने निर्णय पनि गरेको छ । मृतकका परिवारलाई दिइने राहत र घाइतेको उपचार खर्च तत्काल निकासा गर्न बैठकले अर्थ मन्त्रालयलाई निर्देशन पनि दिएको छ ।

सोमबार सप्तरीको राजविराजमा भएको नेकपा एमालेको सभा विथोल्न पुगेकाहरुमाथि प्रहरीले गोली चलाउँदा चार जनाको ज्यान गएको थियो । बैठकले घटनाबारे छानबिन गर्न १५ दिनको समय दिएर जाँचबुझ समिति बनाउने निर्णय पनि गरेको छ ।