बाँकेमा बस र मोटरसाइकल ठोक्किँदा दुईजनाको मृत्यु

बाँके, माघ २ । बाँकेमा बस र मोटरसाइकल एक आपसमा ठोक्किँदा दुईजनाको मृत्यु भएको छ ।

जिल्ला ट्राफिक प्रहरी कार्यालय बाँकेका अनुसार साप्तीसोनारी–७ फत्तेपुर सर्रामा मंगलबार साँझ भएको दुर्घटनामा मोटरसाइकलमा सवार दुईजनाको ज्यान गएको हो ।

नरैनापुरबाट नेपालगञ्ज जाँदै गरेको भे १ ख ३७७४ नम्बरको बस र फत्तेपुरबाट नेपालगञ्जतिर आइरहेको भे ६ प ८८३६ नम्बरको मोटरसाइकल ठोक्किएका हुन् ।

गम्भीर घाइते भएका मोटरसाइकल चालक राप्तीसोनारी–७ फत्तेपुर सर्राका २७ वर्षीय दिलबहादुर थारु र पछाडि सवार २३ वर्षीय राजेश थारुको उपचारका क्रममा नेपालगञ्जमा मृत्यु भएको ट्राफिक प्रहरी कार्यालय बाँकेका निमित्त प्रमुख प्रहरी वरिष्ठ नायब निरीक्षक नन्द प्रसाद पोखरेलले बताए ।

प्रहरीका अनुसार दुर्घटनालगत्तै बस चालक फरार भएका थिए । तीव्र गतिका कारण दुर्घटना भएको हुनसक्ने प्रहरीको अनुमान छ ।