बिहार लोकसभाका सांसद पप्पु यादव नेपाल आउँदै

काठमाडौँ । भारतका लरेन्स विष्णोई गिरोहबाट धम्की पाइरहेका भारत बिहार पूर्णियाका लोकसभा सांसद पप्पु यादव नेपाल भ्रमणमा आउने भएका छन् ।

निजी भ्रमणमा आउने भनिए पनि नेपाल भ्रमणको उद्देश्य खुलाइएको छैन । माघ २ गते नेपाल आउन लागेका उनी ३ गते भारत फर्किने बताइएको छ । उनी नेपाल भ्रमण आएको मौकामा नेपाल यादव युवा संघले माघ ३ गते नेपाल–भारतः यादव समाजको अवस्था विषयक छलफल तथा सम्मान कार्यक्रम आयोजना गरेको छ ।

सन् १९९१ देखि पटक पटक बिहारबाट चुनाव लडेका पप्पु यादव ६ पटक सांसद भइसकेका छन् । त्यसमध्ये उनी चार पटक स्वतन्त्र जितेका थिए ।

आफ्नो अभिव्यक्तिले सधैँ चर्चामा रहने उनी लरेन्स विष्णोइको बारेमा दिएको अभिव्यक्तिका कारण विवादमा मात्र तानिएका छैनन् उनलाई सोही गिरोहबाट ज्यान मार्ने धम्की समेत आइरहेको छ ।

उनले केन्द्रीय सरकारबाट सुरक्षाको माग समेत गरेका छन् । भारत बिहारका मधेसपुर जिल्लाको खुर्दा करवेलीका उनी जन अधिकार पार्टी (लोकतान्त्रिक)का अध्यक्ष पनि हुन् । उनले अहिले सो पार्टीलाई काँग्रेसमा विलय गराइसकेका छन् ।

सन् २०१५ मा लालु यादवको पार्टी राष्ट्रिय जनता दलबाट अलग भएर जन अधिकार पार्टी गठन गरेका थिए । तर नौ वर्षमा एक पटक पनि सो पार्टी चुनाव जित्न सकेन । सन् २०१८ मा उनले भारतकै सर्वश्रेष्ठको सांसदको उपाधि ‘फेम इन्डिया श्रेष्ठ सांसद सम्मान २०१८’ समेत पाएका थिए ।