हवाई फायर गरेर १२० केजी गाँजा बरामद, ६ जना पक्राउ

धनकुटा, पुस २५ । प्रहरीले धनकुटामा हवाई फायर गरेर गाँजा बरामद गरेको छ । जिल्लाको प्रसाँगुरीगढी गाउँपालिका–९ चाँदी बजारबाट प्रहरीले बिहीबार बिहान १२० किलोग्राम गाँजासहित ६ जनालाई पक्राउ गरेको हो ।

चाँदी बजारबाट धरानतर्फ गाँजा लैजाँदै गरेका व्यक्तिहरूले बिहान सवा ४ बजे चेकजाँचका क्रममा इलाका प्रहरी कार्यालय भेडेटारबाट खटिएका टोलीमाथि आक्रमणको प्रयास गरेपछि हवाई फायरिङ गर्नु परेको प्रहरीले जनाएको छ ।

पाँच वटा मोटरसाइकलमा राखेर लैजाँदै गरेको अवस्थामा संलग्न ६ जना व्यक्तिलाई नियन्त्रणमा लिइएको जिल्ला प्रहरी कार्यालयका प्रवक्ता डीएसपी ओमप्रकाश खनालले जानकारी दिए ।

उनका अनुसार प्रहरीसँग जम्का भेट भएपछि उनीहरुले प्रहरी माथि आक्रमण प्रयास गरिएका थिए ।