तिब्बत महाभूकम्पको २४ घण्टा : चीनमा ५१५ वटा परकम्प
एजेन्सी । चीनको तिब्बतमा मंगलबार आएको विनाशकारी भूकम्पपछि २४ घण्टामा ५१५ वटा परकम्प महसुस गरिएको छ ।
चीन भूकम्प सञ्जाल केन्द्रका अनुसार स्थानीय समयानुसार बुधबार बिहान ८ बजेसम्म ५१५ वटा परकम्प गएका हुन् । परकम्पमा सबैभन्दा ठूलो ४.४ म्याग्निच्युडको रहेको चिनियाँ सरकारी अखबार ग्लोबल टाइम्सले जनाएको छ ।
मंगलबार आएको भूकम्पले कम्तीमा १२६ जनाको ज्यान लिएको छ । हजारौँ भवन क्षतिग्रस्त भएको चिनियाँ अधिकारीहरूले जानकारी दिएका छन्।
मंगलबार बिहान नेपाली समयअनुसार ६ बजेर ५० मिनेटमा चीनको सिजाङ प्रान्तको सिगात्सेस्थित दिङ्गी गाउँलाई केन्द्रबिन्दु बनाएर ७ रिक्टरस्केलको शक्तिशाली भूकम्प गएको थियो ।
प्रकाशित मिति: २४ पुस २०८१, बुधबार
