ग्यास चुहिएर आगलागी हुँदा एक जनाको मृत्यु, दुई घाइते
काठमाडौँ, पुस २२ । पर्वतमा खाना पकाउने ग्यास चुहिएर आगलागी हुँदा एक जनाको मृत्यु भएको छ ।
जिल्लाको कुश्मा नगरपालिका–१० पीपलटारीमा खाना पकाउने ग्यास चुहिएर आगलागी हुँदा एक बृद्धाको घटनास्थलमै मृत्यु भएको छ भने अन्य दुई जना घाइते भएका हुन् । मृत्यु हुनेमा ७३ वर्षीया बृद्धा दुर्गादेवी पौडेल छन् ।
आगलागीमा परेर पीपलटारीस्थित तल्लो रोहोटेका घरधनी ५२ वर्षीय ध्रुब रेग्मी र तिला रेग्मी घाइते भएका वडा अध्यक्ष रामचन्द्र सुवेदीले जानकारी दिए ।
ग्यास सिलिन्डर परिवर्तन गर्ने क्रममा चुहिएर एक्कासी आगलागी हुँदा चिया पिउने दूध लिन रेग्मीको घरमा गएकी ७३ वर्षीया बृद्धा दुर्गादेवी पौडेलको जलेर घटनास्थलमै मृत्यु बताइएको छ ।
उक्त आगलागीमा परेर गम्भीर घाइते भएका घरधनी ५२ वर्षीय रेग्मीको जिल्ला अस्पतालमा उपचार हुन नसकेपछि थप उपचारका लागि पोखरा पठाइएको प्रहरीले जानकारी दिएको छ ।
आगलागीलगत्तै सदरमुकाम कुश्माबाट पुगेको प्रहरी र सशस्त्र प्रहरीको टोलीले आगो नियन्त्रणमा लिएको थियो । आगलागीबाट घरमा क्षति पुगेको छ । घटनाबारेथप अनुसन्धान भइरहेको प्रहरीले जनाएको छ ।
प्रकाशित मिति: २२ पुस २०८१, सोमबार
