दशककै सबैभन्दा खराब हिमपातको डरमा अमेरिका

वासिङ्टन डिसी । अमेरिकामा यो जनवरी दशककै सबैभन्दा भीषण हिमपात हुने आशङ्का गरिएको छ । हिमपात र चिसोका कारण दसौँ लाख अमेरिकीहरूको जनजीवन प्रभावित हुने आशङ्का गरिएको छ ।

हिमपात सुरु हुन अघि प्रशासनले पूर्व तयारीको काम सुरु गरेको छ । अमेरिकामा भारी हिमपात हुने र तापक्रम एक दशकयताकै न्यून हुने मौसम पूर्वानुमान महाशाखाले जनाएको छ । नेशनल वेदर सर्भिसका अनुसार यो आँधी अमेरिकाको मध्य भागबाट सुरु भएको र आगामी केही दिनमा पूर्वतिर सर्ने बताइएको छ ।

मिसिसिपी र फ्लोरिडासमेत पहिला भीषण चिसो नहुने अमेरिकाकाका केही स्थानमा समेत स्थिति झनै बिग्रने चेतावनी दिइएको छ । मौसम खराब हुनुको मुख्य कारण ध्रुवीय भोर्टेक्स (आर्कटिक वरपर घुम्ने चिसो हावाको क्षेत्र) भएको बताइएको छ ।

यो जनवरी अमेरिकामा सन् २०११ पछि सबैभन्दा चिसो जनवरी हुने अपेक्षा गरिएको एक्यूवेदर फोरकाष्टर डीपाड्विनले भने । मौसम विभागका अनुसार आइतबार मध्य अमेरिकामा जनजीवन निकै प्रभावित हुनेछ र सडकको अवस्था पनि राम्रो हुनेछैन ।