मातृभूमि जागरण अभियान चलाउने भीम रावलको घोषणा
काठमाडौं । नेकपा एमालेको कारबाहीमा परेमा नेता भीम रावलले मातृभूमि जागरण अभियान चलाउने भएका छन्।
बुधबार आज पत्रकार सम्मेलन गरेका नेता रावलले मातृभूमि जागरण अभियान सञ्चालन गर्ने घोषणा गरेका हुन्।
देश र जनताको हक र हितका लागि सबै देशभक्त इमान्दार शक्ति, व्यक्ति र समुदायलाई एकताबद्ध गर्ने उनको भनाई छ ।
नेता रावलले भने,’देश र जनताले भोगिरहेका समस्याहरूको समाधान र चुनौतीहरूको सामना गर्दै स्वाधीन, स्वतन्त्र र स्वाभिमानी नेपाललाई पुनर्जागरणको दिशामा अगाडि बढाउनुपर्छ । स्वदेश र प्रवासमा रहेका नेपालीहरूका आवाज, आकांक्षा र आवश्यकतालाई गहिरो गरी मनन र विश्लेषण गर्दै राज्य र राजनीतिलाई त्यसको सेवामा समर्पित गर्नुपर्छ ।’
देशको जनशक्ति र प्राकृतिक स्रोत सर्वप्रथम देशको सर्वोपरि हितमा परिचालित र उपयोग हुनुपर्ने कुरालाई नीति र निर्णयमा स्थापित गर्नुपर्ने उनको भनाइ छ ।
प्रकाशित मिति: १७ पुस २०८१, बुधबार
