हात्तीको आक्रमणबाट दुई जनाको मृत्यु

उर्लाबारी, पुस १६ । मोरङको सुन्दरहरैँचामा हात्तीको आक्रमणबाट १० दिनको फरकमा दुई महिलाको मृत्यु भएको छ ।

सोमबार घाँस काट्न जंगल गएकी सुन्दरहरैँचा–५ डिपुकी ६० वर्षीया चन्द्रकला लिम्बूको जङ्गली हात्तीको आक्रमणबाट मृत्यु भएको छ ।

साँझसम्म घर नआउनु भएकी चन्द्रकलालाई मङ्गलबार बिहान ६ बजेतिर स्थानीयले खोल्सीको किनारमा मृत अवस्थामा भेटेका थिए ।

लिम्बूको शव उठाएर पोस्टमार्टमका लागि अस्पताल पठाउन लागिएको इलाका प्रहरी कार्यालय बेलबारीका प्रहरी निरीक्षक कृष्ण खत्रीले जानकारी दिए ।

यसअघि पुस ५ गते सोही नगरपालिकाको वडा नं. ७ कि ४० वर्षीय गङ्गामाया मगर (श्रेष्ठ)को हात्तीको आक्रमणबाट मृत्यु भएको थियो ।