रौतहटको एक दलित बस्तीमा भीषण आगलागी
रौतहट, पुस १५ । रौतहटको राजदेवी नगरपालिकाको एक दलित बस्तीमा भीषण आगलागी भएको छ ।
आइतबार राति ११ बजेको समयमा राजदेवी नगरपालिका ५ पताहीस्थित दलित बस्तीमा आगलागी भएको हो । आगलागीबाट ७ घर जलेर खरानी भएको छ ।
स्थानीय जगरनाथ पासवानको घरबाट आगो सल्केर टोलमा नै आगोले वितण्डा मच्चाएको पाइएको छ । विद्युत सर्ट भएर आगो लागेको प्रारम्भिक अनुमान गरेको जिल्ला प्रहरी कार्यालय रौतहटले जनाएको छ ।
अबेर राति भएको आगलागीले रामनाथ पासवान, राम ईश्वर पासवान, बाबुलाल पासवान, नागेन्द्र पासवान, विजय पासवान, दीपेन्द्र पासवान, राम स्वर्गीय पासवानको घर जलेको छ ।
घरसँगै घरमा रहेको लत्ताकपडा गरगहना, खाद्यान्न लगायतको सामग्री पनि खरानी भएको छ ।
जिल्ला प्रहरी कार्यालय रौतहटका प्रवक्ता डीएसपी दीपेन्द्र रायले आगलागीबाट १० लाख रुपैयाँभन्दा बढीको धनमाल जलेर नष्ट भएको बताएका छन् ।
उनका अनुसार गौर नगरपालिकाको दम, स्थानीयवासी तथा प्रहरी प्रशासनको संयुक्त प्रयासमा आगो नियन्त्रणमा लिइएको छ ।
प्रकाशित मिति: १५ पुस २०८१, सोमबार
