‘सुर्खेतको इतिवृत–२’ विमोचित
कर्णाली, १३ पुस । पत्रकार सुशीलराज शर्माद्वारा लिखित ‘सुर्खेतको इतिवृत्त–२’ विमोचन गरिएको छ ।
पत्रकार महासङ्घ शाखा सुर्खेतका नवनिर्वाचित अध्यक्ष शर्माद्वारा लिखित पुस्तकको आज सुर्खेतको वीरेन्द्रनगरमा आयोजित कार्यक्रममा कर्णाली प्रदेशका मुख्यमन्त्री यामलाल कँडेलले विमोचन गर्नुभयो ।
त्यस अवसरमा मुख्यमन्त्री कँडेलले पुस्तकमा दस्ताबेजीकरण गरिएका तथ्यका सुर्खेत जिल्लाको विकास नीति तय गर्न सहयोगी हुने विश्वास व्यक्त गर्नुभयो ।
उहाँले हरेक प्राज्ञिक र तथ्यगत लेखनले नीति निर्माणका साथै समाज रूपान्तरणमा सहयोग पुग्ने धारणा राख्नुभयो । पुस्तकमा सुर्खेत जिल्लाको पुरातात्विक, सांस्कृतिक, सामाजिक, भौगोलिक, प्रशासनिक, राजनीतिक, जनसाङ्ख्यिक अवस्था तथा जनविश्वास र मूल्यलाई लिपिबद्ध गरिएको छ ।
त्यसैगरी, जिल्लाको शिक्षा, खेलकुद, कला, साहित्य, सङ्गीतलगायतका विविध पाटोलाई तथ्यपरक ढङ्गबाट पुस्तकमा चर्चा गरिएको छ । शर्माले यसअघि ‘सुर्खेतको इतिवृत्त–१’ प्रकाशन गरिसक्नुभएको छ । यो पुस्तक अङ्ग्रेजी र नेपाली भाषामा लेखिएको छ ।
प्रकाशित मिति: १३ पुस २०८१, शनिबार
