इटालीमा रक्सी नभएको वाइन उत्पादनका लागि अनुमति

रोम । इटालीको सरकारले अल्कोहल निकै कम भएको वा हुँदै नभएको वाइनको उत्पादनलाई अनुमति दिएको छ । तर यसको लेबलमा भने ‘वाइन’ शब्दलाई राखिनेछ । सोमबार कृषि मन्त्रालयले उक्त अध्यादेश पारित गरेसँगै अल्कोहल–फ्री वाइनको उत्पादनलाई कानुनी मान्यता दिने दुई वर्ष देखिको प्रक्रिया अन्त्य भएको छ ।

यसअघि इटालीको नियममा वाइनको लेबलमा कम्तीमा साढे ८ प्रतिशत रक्सी हुनुपर्थ्यो । वाइन उत्पादन गरिरहेका अन्य शीर्ष देशहरूमा जस्तो इटालीको यो वाइन ‘वाइन अफ प्रोटेक्टेड डिनोमिनेशन अफ ओरिजिन’ (पीडीओ) मा पर्ने छैन । इटलीको बजारमा सन् २०२५ मा यो वाइन आउने आशा गरिएको छ ।

सरकारको यो कदमले तीव्र गतिमा बढिरहेको इटालीको वाइन उद्योग थप बढ्ने आशा गरिएको छ । इटलीले गएको वर्ष ४ करोड ३९ लाख हेक्टोलिटर परम्परागत वाइन उत्पादन गरेको थियो । आगामी दशकसम्ममा विश्वमा अल्कोहल निकै कम भएको वा हुँदै नभएको वाइनको बजार १० प्रतिशतभन्दा धेरै बढ्ने अनुमान गरिएको छ ।