फुल्चोकी जंगलमा हराएका १३ जना युवायुवती फेला
काठमाडौँ, पुस ९ । ललितपुरको फुल्चोकी जंगलमा हराएका १३ जना फेला परेका छन् ।
सोमबार दिउँसो फुलचोकी घुम्न गएर उतै सम्पर्कविहीन भएका १३ जना युवायुवतीलाई गएराति नौ बजेतिर प्रहरीले सकुशल उद्धार गरेको हो ।
उनीहरु मंगलबार बिहान बाटो भुलेर बेपत्ता भएको पाइएको जिल्ला प्रहरी परिसर ललितपुरका प्रवक्ता एसपी नवरत्न पौडेलले जानकारी दिए ।
सोमबार फुल्चोकी घुम्न गएका १० जना युवक र तीनजना युवती दिउँसोदेखि बाटो भुलेर जंगलमा हराएका थिए । उनीहरु हराएको सूचना पाएपछि प्रहरीले उद्धार कार्य सुरु गरेको थियो।
यसअघि पनि फुल्चोकी जंगलमा घुम्न जानेहरू पटक पटक हराएका थिए । फुल्चोकी काठमाडौँ उपत्यकाकै अग्लो स्थान हो ।
प्रकाशित मिति: ९ पुस २०८१, मंगलबार
