एनपीएलको उपाधिका लागि सुदूरपश्चिम र जनकपुर भिड्दै
काठमाडौं, पुस ६ । नेपाल प्रिमियर लिग (एनपीएल) को उपाधिका लागि आज (शनिबार) सुदूरपश्चिम रोयल्स र जनकपुर बोल्ट्स भिड्दैछन् ।
खेल कीर्तिपुरस्थित क्रिकेट मैदानमा साढे १२ बजे शुरू हुनेछ । सुदूरपश्चिम र जनकपुरबीच यसअघि दुईपटक प्रतिस्पर्धा भएको थियो । दुवै खेलको नतिजा सुदूरपश्चिमको पक्षमा आएको थियो ।
सुदूरपश्चिमले जनकपुरलाई लिगमा ७३ रन र पहिलो क्वालिफायरमा ८ विकेटको फराकिलो अन्तरले हराएको थियो । तेस्रोपल्ट यी दुई टोली शनिबार आमनेसामने हुँदै छन् ।
सुदूरपश्चिमका कप्तान दीपेन्द्रसिंह ऐरीले जनकपुर पनि बलियो टीम भएकाले राम्रो योजना बनाएर खेल्ने बताए ।
जनकपुरका कप्तान आसिफ शेखले पछिल्ला खेलमा राम्रो ब्याटिङ गर्न नसके पनि फाइनलमा राम्रो खेल्ने आशा व्यक्त गरे ।
दुई दिनअगाडि नै सबै टिकट बिक्री भइसकेकाले फाइनलमा दर्शकको उपस्थिति बाक्लो हुने भएको छ ।
प्रकाशित मिति: ६ पुस २०८१, शनिबार
