सुनको गहनामा जर्तीको नाममा रकम असुल्ने कार्य बन्द गर्न आग्रह

काठमाडौँ । पछिल्लो समय केही व्यवसायीले सुनको गहना बिक्रीमा जर्तीको नाममा ग्राहकसँग रकम असुल नगर्ने घोषणा गरिरहेको बेला कैयन सुनचाँदी व्यवसायीले भने अझै पनि यसलाई निरन्तरता दिइरहेका छन् ।

यसरी जर्तीको नाममा रकम असुलिँदा उपभोक्तालाई अतिरिक्त भार र राज्यले पनि राजश्व नपाउने अवस्था रहेको सरोकारवालाको भनाइ छ ।

जर्तीको नाममा रकम असुल्ने कार्य परम्परागत भएको रिद्धिसिद्धि ज्वेलर्सका सञ्चालक नरेन्द्र कुमार गुप्ता बताउँछन् । उनले गहनामा जति रकम लिनुपर्ने हो लिने हो ज्यालाकै रूपमा मात्रै पारदर्शी रूपमा ग्राहकबाट लिनुपर्ने धारणा राखे । तर, जर्तीको नाममा अपारदर्शी ढंगले ग्राहकबाट अतिरिक्त असुल गरिनु गलत भएको उनको भनाइ छ ।

गुप्ताकै अगुवाइमा पछिल्लो समय सुनको गहना निर्माणमा जर्ती नलाग्ने र निश्चित रकम ज्यालाको रूपमा मात्रै लिनुपर्ने अभियान चलिरहेको छ । यो अभियानलाई पछ्याएर केही व्यवसायीले जर्ती नलिने घोषणा गरेपनि सुनचाँदीसँग सम्बन्धित संघ तथा महासंघकै संरक्षणमा जर्तीको नाममा रकम असुल्ने काम भइरहेको एक व्यवसायीले बताए ।