चुनावको मिति घोषणा गर्न एमालेको माग

काठमाडौं, फागुन ३

नेकपा एमालेले संविधान बमोजिम तीन तहका निर्वाचनको मिति घोषणा गर्न सरकारसँग माग गरेको छ।  मंगलबार अध्यक्ष केपी शर्मा ओलीको निवास बालकोटमा बसेको एमाले स्थायी कमिटी बैठकले २०७४ बैशाख/जेठमा स्थानीय तह र मंसिरमा प्रदेश तथा प्रतिनिधिसभाको निर्वाचन गर्न माग गरेको हो।

संविधानमा तोकिएबमोजिम तीन तहको निर्वाचन गर्ने अडान कायम राख्दै २०७४ बैशाख/ जेठमा स्थानीय तह र मंसिरमा प्रदेश र प्रतिनिधिसभाको निर्वाचन गर्न दबाब दिने निर्णय स्थायी कमिटी बैठकले गरेको हो। बुधबार र बिहीबार बस्न लागेको एमाले पोलिटब्यूरो बैठकका एजेन्डा तय गर्न बसेको बैठकले फागुन २१ देखि चैत ५ सम्म गर्न लागेको मेची महाकाली अभियानलाई  सशक्त बनाउने पदाधिकारीको निर्णयलाई अनुमोदन गरेको छ।

एमालेले स्ववियु निर्वाचन फागुन १४ मै गर्न विशेष जोड दिएको छ। निर्वाचन भाँड्न विभिन्न क्याम्पस र विश्वविद्यालयमा भैरहेको तोडफोड, आगजनी, तालाबन्दीप्रति उसले चिन्ता व्यक्त गरेको छ।  बैठकपछि एमाले प्रवक्ता योगेश भट्टराईले सबै राजनीतिक दललाई चुनावमा सहभागी गराउने उद्देश्यले एमालेले मधेसी मोर्चा आवद्ध दलहरुसँग छलफल गरिरहेको बताए।