एमालेले दानमा पाएको जग्गासम्बन्धी विवादको पेसी न्यायाधीशद्वय श्रेष्ठ र ढुङ्गानाको इजलासमा

एमालेले दानमा पाएको जग्गासम्बन्धी विवादको पेसी न्यायाधीशद्वय श्रेष्ठ र ढुङ्गानाको इजलासमा
काठमाडौँ । पार्टी कार्यालय निर्माणका लागि नेकपा एमालेले दानमा पाएको जग्गा विवादसम्बन्धी मुद्दाको पेसी न्यायाधीशद्वय तिलप्रसाद श्रेष्ठ र टेकप्रसाद ढुङ्गानाको इजलासमा तोकिएको छ।

व्यवसायी मीनबहादुर गुरुङले एमालेलाई दानमा जग्गा दिएपछि त्यसविरुद्ध अधिवक्ता ज्ञानबहादुर बस्नेतले सर्वोच्चमा रिट दायर गरेका थिए ।

यद्यपि लामो समयदेखि यो मुद्दाको पेसी तोकिने अनि सुनुवाइ नहुने हुँदै आएको छ। जसअनुसार मंगलबार पनि रिटको पेसी तोकिएको हो ।

गुरुङले एमालेको केन्द्रीय कार्यालय बनाउन असोज २५ गते काठमाडौँको कीर्तिपुर नगरपालिका–२, मैत्रीनगरमा रहेको १० रोपनी १४ आना जग्गा दान गरेको घोषणा गरेका थिए। सोही दिन प्रधानमन्त्री ओलीको दम्पती र जग्गादाता गुरुङ दम्पतीले संयुक्त रूपमा एमाले मुख्यालय भवनको शिलान्याससमेत गरेका थिए।

उक्त मुद्दा सुरुमा सर्वोच्च प्रशासनले दरपिठ गरिदिएको थियो भने पछि दरपिठविरुद्ध इजलासमा निवेदन दिएपछि न्यायाधीश तिलप्रसाद श्रेष्ठको इजलासले दर्ता गर्न आदेश दिएको थियो । दर्ता भएको रिटको पहिलो सुनुवाइ गर्दै सुनिलकुमार पोखरेलको एकल इजलासले अन्तरकालीन आदेश जारी गरेको थियो ।