नेपाल प्रिमियर लिग : जनकपुरविरुद्ध १२ ओभरमा पोखराको ७९ रन

काठमाडौं । नेपाल प्रिमियर लिग (एनपीएल)को चौथो दिनको पहिलो खेलमा पोखरा एभेन्जर्स १२ ओभरमा चार विकेट गुमाउँदै ७९ रन बनाएको छ।

कीर्तिपुरस्थित टियु क्रिकेट मैदानमा जनकपुर बोल्ट्सविरुद्ध टस हारेर ब्याटिङको निम्तो पाएको पोखराले पावरप्लेमा २ विकेट गुमाउँदै ३५ रन बनाएको थियो।

पहिलो विकेटको रुमपा पोखराले एन्ड्रिज गोउसको विकेट गुमाएको हो। उनले १६ बलमा ३ चौका र १ छक्कासहित २० प्रहार गरेका हुन्।

उनलाई ललित राजवंशीले पाचौं ओभरको अन्तिम बलमा आसिफ शेखको हातबाट क्याच आउट गराएका हुन्।

दोस्रो विकेट अर्का ओपनर दिनेश खरेलको गयो। छैटौं ओभरको पाँचौं बलमा उनी १७ बलमा १० रन बनाउँदै नसिमको बलमा तुलबहादुर थापाको हातबाट क्याच आउट भए।

पोखराको तेस्रो विकेटका रुपमा कप्तान कुशल भुर्तेल ६ रन बनाउँदै ललित राजवंशीको बलमा स्टम्पिङ आउट भए।

यसैबीच पोखराको चौथो विकेट पनि पतन भएको छ। दिलीप नाथ १४ बलमा ११ रन बनाएर पेभेलियन फर्किएका छन्।