एनपिएल : आज पनि दुई खेल हुँदै, पहिलो जितको खोजीमा पोखरा

काठमाडौं, मंसिर २० । सिद्धार्थ बैंक नेपाल प्रिमियर लिग(एनपिएल) मा आज (बिहिवार) पनि दुई खेल हुँदैछन् ।

आजको पहिलो खेलमा पोखरा एभेन्जर्स र जनकपुर बोल्ट्स खेल्न लागेका हुन् । खेल कीर्तिपुरमा रहेको टियु क्रिकेट मैदानमा बिहान ९ बजे पछि सुरु हुनेछ ।

कुशल भुर्तेलको कप्तानीमा रहेको पोखरा पहिलो खेलमा पराजित भएकाले यस खेलमा जितको खोजीमा छ । पोखरा पहिलो खेलमा चितवन राइनोजसँग ८७ रनले पराजित भएको थियो ।

सुरुवाती दुवै खेलमा जित हासिल गरेको जनकपुर यस खेलमा पनि जितको लयलाई निरन्तरता दिन चाहन्छ ।

अनिल शाहको कप्तानीमा रहेको जनकपुरले पहिलो खेलमा विराटनगर किंग्स तथा दोस्रो खेलमा कर्णाली याक्सलाई समान ८ विकेटले हराएको थियो ।

आजै हुने दोस्रो खेलमा काठमाडौं गुर्खाज र सुदूरपश्चिम रोयल्सबीच खेल हुँदैछ । एक खेलमा जित १ मा हार बेहारेको काठमाडौं बलियो टोली सुदूरपश्चिमलाई हराएर जितको लयलाई निरन्तरता दिन चाहन्छ ।

सुरुवाती खेलबाटै जितको लयलाई निरन्तरता दिएको सुदूरपश्चिम पनि जितको यात्रालाई निरन्तरता दिन चाहन्छ । पुस ६ गतेसम्म चल्ने एनपिएलमा ८ टोलीको सहभागिता छ ।