यु–१९ एसिया कप क्रिकेटमा बङ्गलादेशसँग नेपालको फराकिलो हार
काठमाडौँ, १६ मङ्सिर । संयुक्त अरब इमिरेट्स ९युएई० मा जारी एसिसी यु–१९ एसिया कप क्रिकेटमा नेपालले लगातार दोस्रो हार खेपेको छ ।
समूह ‘बी’ अन्तर्गत आइतबार भएको खेलमा नेपाल बङ्गलादेशसँग पाँच विकेटले पराजित भयो ।
जितका लागि एक सय ४२ रनको लक्ष्य पछ्याएको बङ्गलादेशले २८.४ ओभरमा पाँच विकेटको क्षतिमा लक्ष्य पूरा गरेको हो । बङ्गलादेशका लागि ओपनर जवाड अबररले ५९ रन बनाउनुभयो । कप्तान अजिजुल हासिकमले अविजित ५२ र फरिद हसनले १३ रन बनाउनुभयो ।
बलिङमा नेपालका युवराज खत्रीले चार विकेट लिनुभयो । उहाँले ६ ओभरमा २३ रन खर्चिएर उक्त विकेट लिनुभएको हो । हेमन्त धामीले एक विकेट झार्नुभयो । यसअघि दुबई अन्तर्राष्ट्रिय रङ्गशालामा टस हारेर पहिले ब्याटिङको निम्तो पाएको नेपालले ४५।४ ओभरमा सबै विकेटको क्षतिमा एक सय ४१ रन बनाएको थियो ।
नेपालका लागि ओपनर आकाश त्रिपाठीले सर्वाधिक ४३ रन बनाउनुभयो । उत्तम रङ्गु थापामगर र अभिषेक तिवारीले २९र२९ रन बनाउनुभयो । अन्य खेलाडीले दोहोरो अङ्कमा रन बनाउन सक्नुभएन ।
नेपाललाई सस्तैमा समेट्न बङ्गलादेशका अल फहाद, मोहम्मद इकबाल हसन इमोन र रिजन हुसेनले दुई दुई विकेट लिनुभयो । साद इस्लाम रजीन, मोहम्मद रफी उज्जामान र मोहम्मद अजिजुल हाकिम तमिमले एक एक विकेट झार्नुभयो ।
नेपाल पहिलो खेलमा श्रीलङ्कसँग ५५ रनले पराजित भएको थियो । नेपालले अब समूहको अन्तिम खेल मङ्गलबार अफगानिस्तानसँग खेल्नेछ । लगातार दुई हारसँगै नेपालको सेमिफाइनल पुग्ने सम्भावना सकिएको छ ।
समूह ‘ए’ मा आयोजक युएई, भारत, पाकिस्तान र जापान रहेको छ । सेमिफाइनल खेल मङ्सिर २१ र फाइनल खेल २३ गते हुनेछ ।
प्रकाशित मिति: १६ मंसिर २०८१, आइतबार
