किशोरलाई लागूऔषध खुवाएर कुटपिट गर्ने तीन जना पक्राउ
काठमाडौं । कैलालीमा दुई किशोरलाई अपहरण गरी बन्धक बनाएर कुटपिट गर्ने तीन जनालाई प्रहरीले पक्राउ गरेको छ ।
पक्राउ पर्नेमा कैलालीकै गोदावरी नगरपालिका–१, अत्तरियाका २४ वर्षीय भूपी खड्का, धनगढी–१, सन्तोषी टोलमा बस्दै आएका कञ्चनपुरको बेलौरी नगरपालिका–५ का १८ वर्षीय किशोर र डडेलधुराको अमरगढी नगरपालिका–१का १८ वर्षीय किशोर छन् ।
उनीहरुले धनगढी उपमहानगरपालिका–४, तारानगरमा डेरा गरी बस्दै आएका दुई किशोरलाई बन्धक बनाएर कुटपिट गरेको आरोप छ ।
सोमबार उनीहरूलाई पक्राउ गरिएको प्रहरी प्रधान कार्यालयले जनाएको छ ।
धनगढी–४, तारानगरस्थित एक घरमा बन्धक बनाएर लागूऔषध खुवाई खुकुरी देखाएर तीनजना मिलेर आइतबार कुटपिट गरेको पीडितको भनाइ छ ।
उक्त उजुरीका आधारमा उनीहरूलाई पक्राउ गरिएको प्रहरीले जनाएको छ ।
प्रकाशित मिति: ११ मंसिर २०८१, मंगलबार
