रुखले च्यापिएर घाइते भएका दुई जनाको हेलिकोप्टरबाट उद्धार

धनगढी, मंसिर १० । बाजुराको विकट क्षेत्र बिच्छ्याँमा आइतबार रुखले च्यापिएर घाइते भएका दुई जनाको सोमबार बिहान नेपाली सेनाको हेलिकोप्टरबाट उद्धार गरिएको छ ।

रुखले च्यापिएर एक जनाको घटनास्थलमै मृत्यु भएको थियो भने दुई जना घाइते भएका थिए । घटनामा घाइते भएका ४८ वर्षीय सिदुपुरी रोकाया र अन्दाजी ३० वर्षीय पर्मलाल सुनारको उद्धार गरिएको हो । आइतबार हेलिकोप्टर नपाएर उनीहरुको उद्धार हुन सकेको थिएन ।

घाइतेहरूलाई उपचारका लागि सोमबार बिहानै सुर्खेत पठाइएको बाजुराका प्रमुख जिल्ला अधिकारी मेघनाथ पाध्याले बताए । रुखमा च्यापिएर हिमाली गाउँपालिका–३ बिच्छ्याँका ४३ वर्षीय सुपधन बुढाको घटनास्थलमै मृत्यु भएको थियो ।

गाउँमा बिजुली पु¥याउनका लागि काठको पोल बनाउन सल्लाको रुख काट्दै गर्दा रुखमा च्यापिएर एक जनाको घटनास्थलमै मृत्यु भएको थियो भने रोकाया र सुनार गम्भीर घाइते भएका थिए ।