मोरङमा मोटरसाइकल जुध्दा तीन जनाको मृत्यु
उर्लाबारी, मंसिर ७ । मोरङको उर्लाबारी-३ मा दुईवटा मोटरसाइकल एकापसमा जुध्दा तीन जनाको मृत्यु भएको छ।
बिहीबार अपरान्ह पश्चिमबाट पूर्वतर्फ जाँदै गरेको प्रदेश १–०२–०५० प ८४०६ नम्बरको मोटरसाइकल पूर्वबाट पश्चिमतर्फ आउँदै गरेको प्रदेश १–०२–०४३ प ९२२६ नम्बरको मोटरसाइकल एकापसमा ठोक्किदा मोटरसाइकलमा सवार तीन जनाको मृत्यु भएको हो।
मृत्यु हुनेमा मोरङको पथरीशनिश्चरे नगरपालिका–५ का ३३ वर्षीय दीपक धिमाल, कानेपोखरी गाउँपालिका –४ धम्कुवाका २८ वर्षीय किशोर गुरुङ र बेलबारी नगरपालिका–८ का २६ वर्षीय अमित लिम्बू रहेका छन्।
धिमालको अरनिको अस्पताल उर्लाबारीमा, गुरुङको मदन भण्डारी अस्पताल एवम ट्रमा सेन्टर मङ्गलबारेमा र अमृतको विएण्डसी अस्पताल विर्तामोडमा मृत्यु भएको इलाका प्रहरी कार्यालय उर्लाबारीले जनाएको छ।
दुर्घटनामा परी मोरङ पथरीशनिश्चरे –५ का ३८ वर्षीय विष्णु धिमाल घाइते भएका छन् ।
उर्लाबारीबाट थप उपचारका लागि झापाको बिर्तामोडस्थित बीएन्डसी अस्पताल लगिएका उनको अवस्था समेत चिन्ताजनक रहेको प्रहरीले जनाएको छ।
प्रकाशित मिति: ७ मंसिर २०८१, शुक्रबार
