भक्तपुरबाट दुर्गा प्रसाईंका समर्थक पक्राउ
काठमाडौं । मेडिकल व्यवसायी दुर्गा प्रसाईंका १० जना समर्थकहरुलाई प्रहरीले पक्राउ गरेको छ ।
प्रसाईं नेतृत्वको राष्ट्र, राष्ट्रियता, धर्म, संस्कृति र नागरिक बचाउ महाअभियानमा आबद्ध १० जनालाई प्रहरीले पक्राउ गरेको हो।
उनीहरूलाई भक्तपुरबाट पक्राउ गरिएको केन्द्रीय अनुसन्धान ब्यूरो सिआइबीले जनाएको छ । मङ्सिर ७ मा प्रसाईं नेतृत्वको समूहले काठमाडौंमा प्रदर्शन गर्ने तयारी गरेको छ ।
भड्काऊ पूर्ण आन्दोलन गर्नसक्ने आशंकामा प्रहरीले उनीहरूलाई पक्राउ गरेको हो । उनीहरूलाई जिल्ला प्रहरी परिसर भक्तपुरमा राखिएको छ ।
आरोपीहरुविरुद्ध प्रहरीले सार्वजनिक शान्तिविरुद्धको कसुरमा अनुसन्धान गरिरहेको छ । प्रधानमन्त्री केपी शर्मा ओलीविरुद्ध दुष्प्रचार गरेको आरोपमा प्रसाईंलाई सीआईबीले मंगलबार पक्राउ गरेको थियो ।
प्रकाशित मिति: ५ मंसिर २०८१, बुधबार
