यु–१९ महिला टोलीकी कप्तान महतो सम्मानित

महोत्तरी ४ मङ्सिर । यु–१९ महिला क्रिकेट टोलीकी कप्तान पूजा महतोलाई महोत्तरी गौशाला नगरपालिकाको कार्यालयले सम्मान गरेको छ ।

मङ्गलवार गौशाला नगरपालिकाको कार्यालयमा आयोजित एक कार्यक्रमबीच क्रिकेटर महतोलाई नगर प्रमुख डा. दिपेन्द्र महतोले नगद १ लाख ५१ हजार रुपैयाँ, सम्मानपत्र र मायाको चिनोसहित सम्मान गर्नुभयो।

त्यस अवसरमा नगर प्रमुख डा। महतोले नगर स्तरीय क्रिकेट स्टेडियम बनाउन पालिका प्रक्रियागत रुपमा अगाडि बढिसकेको जानकारी गराउनुभयो ।

नगरपालिकाको कार्यपालिका सदस्य र कर्मचारीहरूले महतोलाई दोसल्ला ओढाएर सम्मान गर्नुभएको थियो । एक गरिब परिवारकी छोरीले क्रिकेट खेलको माध्यमबाट नगरपालिकाको नाम विश्वमै चिनाउन सफल भएको भन्दै प्रशंसा गर्नुभएको थियो ।

आजै प्रदेश सरकारका खेलकुद मन्त्री प्रमोद जयसवाल खेलाडी पूजाको घरमा गई सम्मान गर्नुको साथै बधाई दिनुभयो ।