जयशंकर र चिनियाँ विदेशमन्त्री वाङ यीबिच भेटवार्ता

रियो दि जेनरियो । ब्राजिलको रियो दि जेनरियोमा भइरहेको जी–२० शिखर सम्मेलनका क्रममा भारत र चीनका विदेशमन्त्रीबीच भेटवार्ता भएको छ ।

वाङ यीलाई भेटेपछि भारतीय विदेशमन्त्री एस. जयशंकरले सामाजिक सञ्जाल प्लेटफर्म एक्समा लेखेका छन्, ‘दुई जनाबिच भारत–चीन सीमा क्षेत्रमा डिसइंगेजमेन्टसम्बन्धी प्रगतिबारे कुरा भयो । साथै द्विपक्षीय सम्बन्धको आगामी कदमबारे पनि चर्चा भयो । यसबाहेक विश्वव्यापी अवस्थाबारे पनि छलफल भएको छ ।’

वाङ यीले एस जयशंकरसँग दुई देशबिचको सिधा उडान पुनः बहाल गर्ने, भिसा सुविधा र आफ्ना पत्रकारहरूलाई एकअर्काको देशमा काम गर्न दिनेलगायत धेरै विषयमा कुराकानी गरेको चीनको अंग्रेजी भाषाको सरकारी पत्रिका ग्लोबल टाइम्सले बताएको थियो ।

भारतीय विदेश मन्त्रालयले पनि भारत र चीनले वास्तविक नियन्त्रण रेखा अर्थात एलएसीमा सेनाको गस्ती गर्ने सम्बन्धमा सम्झौता गरेका छन् । यसलाई चिनियाँ विदेश मन्त्रालयले पनि पुष्टि गरेको छ ।

ब्रिक्स शिखर सम्मेलनको छेको पारेर रुसको काजानमा प्रधानमन्त्री मोदी र चिनियाँ राष्ट्रपति सी जिनपिङबीच द्विपक्षीय भेटवार्ता भएको थियो । यसपछि भारतीय विदेश मन्त्रालयले एलएसीबाट सेना फिर्ता गर्ने र २०२० मा सुरु भएको विवाद समाधान गर्न प्रधानमन्त्री मोदी र सी जिनपिङबीच भएको सहमतिलाई स्वागत गरेको बताएको थियो ।