मनाङ र चर्च ब्वाइजको गोलरहित बराबरी
काठमाडौँ, ३ मङ्सिर । मनाङ मस्र्याङ्दी र चर्च ब्वाइज क्लबले ललित स्मृति एन्फा यु–१८ फुटबल लिगमा गोलरहित बराबरी खेल्दै अङ्क बाँडेको छ ।
ललितपुरको सातदोवाटोस्थित एन्फा मैदानमा सोमबार भएको पहिलो खेलमा मनाङ र चर्च ब्वाइजले गोल गर्न सकेनन् ।
बराबरीसँगै १० खेलबाट १९ अङ्क बनाएको मनाङ दोस्रो स्थानमा उक्लिएको छ । १४ अङ्क बनाएको चर्च ब्वाइज छैटौँ स्थानमा छ ।
यस्तै अर्को खेलमा विभागीय टोली त्रिभुवन आर्मी र खुमलटार एफसी १–१ गोलको बराबरीमा रोकियो ।
खुमलटारले ८७औँ मिनेटमा सागर तामाङको गोलमा सुरुवाती अग्रता लिएको थियो । त्यसपछि इन्जुरी समयमा आर्मीका भुवन कामीले गोल गर्दै खेललाई बराबरीमा ल्याउनुभयो ।
अखिल नेपाल फुटबल सङ्घ (एन्फा)को आयोजनामा सञ्चालित लिगमा १२ टोलीको सहभागिता रहेको छ । लिगका खेलहरू डबल राउन्ड रोविनका आधारमा खेलाइएको छ ।
प्रकाशित मिति: ३ मंसिर २०८१, सोमबार
