मंगलबार पार्टी प्रदेश गरेकालाई एमालेले थमायो टिकट

दैलेखको महावु गाउँपालिकाको अध्यक्ष पदमा हुन लागेको उपनिर्वाचनका लागि नेकपा एमालेले जंगबहादुर शाहीलाई उम्मेदवार बनाएको छ । स्मरण रहोस् शाही मंगलबार मात्रै एमालेमा प्रवेश गरेका हुन् ।

नेकपा (एकीकृत समाजवादी) का केन्द्रीय सदस्य रहेका शाहीलाई कर्णालीका मुख्यमन्त्री तथा एमाले स्थायी कमिटी सदस्य यामलाल कँडेलले दैलेख पुगेर पार्टीमा स्वागत गरेका थिए ।

उम्मेदवार बनेका शाही पुर्व एमाले नै हुन् । ०७४ को स्थानीय तहको निर्वाचनमा एमालेबाट सोही गाउँपालिकाको अध्यक्षमा निर्वाचित भएर पाँच वर्ष चलाइसकेका हुन् । यद्यपि तत्कालीन एमाले विभाजन हुँदा अध्यक्ष भइरहेकै बेला उनी माधवकुमार नेपाल नेतृत्वको समाजवादीतिर लागेका थिए ।